Ініцыятарам мерапрыемства выступіў Музей гісторыі развіцця ГрДУ імя Янкі Купалы. Як адзначыў кіраўнік музея Мікалай Макарэеў, падобныя акцыі прышчапляюць маладым людзям пачуццё добрага гонару, глыбокай пашаны да роднай alma mater і стымулююць студэнтаў да актыўнай дзейнасці на карысць свайго ўніверсітэта.

Праект стартаваў адначасова ў чатырох навучальных карпусах. У адкрыцці прынялі ўдзел прадстаўнікі факультэта матэматыкі і інфарматыкі, педагагічнага і філалагічнага факультэтаў, факультэта гісторыі, камунікацыі і турызму.

Так, студэнтам факультэта матэматыкі і інфарматыкі былі прадэманстраваны два фільмы, у якіх адлюстравана гісторыя развіцця навукова-педагагічных школ і асобных кафедраў факультэта, расказаны жыццёвыя гісторыі найбольш вядомых выпускнікоў. Акрамя таго, сваімі ўспамінамі аб універсітэце са студэнтамі падзяліліся прафесар кафедры матэматычнага аналізу, дыферэнцыяльных раўнанняў і алгебры Іван Мартынаў і намеснік дэкана факультэта матэматыкі і інфарматыкі па выхаваўчай рабоце Ірына Трыфанава.

Фільм аб навуковым і творчым шляху прафесара кафедры рускай філалогіі Аляксея Нікіцевіча паглядзелі прадстаўнікі філалагічнага факультэта. Фільмы, прадэманстраваныя на педагагічным факультэце, былі прысвечаны святкаванню 50-годдзя факультэта, а таксама жыццё і навуковую дзейнасць прафесара Чэслава Кірвеля, які прысутнічаў на мерапрыемстве і дапоўніў расказанае пра яго ў фільме ўспамінамі. Аб сваім навуковым і педагагічным шляху распавяла таксама дацэнт кафедры прыродазнаўчых і лінгвістычных дысцыплін і методык іх выкладання Ганна Сідарчук.

На факультэце гісторыі, камунікацыі і турызму адбыўся паказ фільмаў аб дзейнасці прафесара кафедры перакладу і міжкультурнай камунікацыі Людмілы Рычковай, а таксама пра станаўленне і развіццё факультэта. У мерапрыемстве на факультэце гісторыі, камунікацыі і турызму прыняў удзел гісторык, педагог і краязнаўца, публіцыст і грамадскі дзеяч, выпускнік 1969 года гістарычнага факультэта Гродзенскага дзяржаўнага педагагічнага інстытута, дацэнт кафедры гісторыі Беларусі, археалогіі і спецыяльных гістарычных дысцыплін Уладзімір Егорычаў.

Па словах арганізатараў, падобныя мерапрыемствы стануць традыцыйнымі ў ГрДУ імя Янкі Купалы. Ужо ў бліжэйшую пятніцу студэнтам пакажуць новыя фільмы пра гісторыю alma mater.