Збор яблыкаў, асабліва ва ўраджайны год, - справа клапотная, таму гаспадаркі з задавальненнем прымаюць дапамогу ад навучэнскай моладзі. Студатрадаўцы збіраюць і сартуюць яблыкі, укладваюць іх у кантэйнеры для перавозкі. Гатункавыя яблыкі закладваюць у сховішчы, плады таксама ідуць на продаж і на прамысловую перапрацоўку.

Пладова-ягадны сад КСУП "Невяровічы", размешчаны ў аграгарадку Юбілейны, займае каля 100 гектараў. У гаспадарцы вырошчваюць не толькі яблыні, але і грушы, слівы, чарнаплодную рабіну, буякі і іншае. А з нядаўніх часоў эксперыментуюць з вырошчваннем дынь і кавуноў.

Сваімі ўражаннямі пра работу ў складзе студэнцкага атрада падзяліліся купалаўцы.

- Пасля двухдзённай адпрацоўкі магу сказаць, што патрапіла ў вельмі добрае месца. Атрад утварыўся згуртаваны і працавіты, - распавяла Вікторыя Бруцкая-Сцемпкоўская, навучэнка Ваўкавыскага каледжа.

- Адпрацаваўшы два дні на зборы яблыкаў, магу сказаць, што праца на прыродзе - гэта не толькі карысць для арганізма, але і магчымасць атрымаць асалоду ад прыгажосці дрэў і, вядома ж, смачных яблыкаў. У нас выдатны атрад, усе працуюць з энтузіязмам, і гэта сапраўды паднімае настрой. Акрамя таго, фізічная актыўнасць дапамагае падтрымліваць форму і адчуваць сябе камфортна. Гэта выдатны досвед, - падзялілася Юлія Кузьменя, баец студэнцкага сельскагаспадарчага атрада каледжа.

Збор яблыкаў для купалаўцаў і актыўная праца ў студэнцкім атрадзе - гэта не толькі прыемнае баўленне часу, але і выдатная магчымасць зарабіць і атрымаць асалоду ад прыгажосці восеньскага саду.