Перад урачыстай цырымоніяй узнагароджання адбыўся семінар "Адкрыты мікрафон", падчас якога прадстаўнікі ўсіх каманд змаглі абмеркаваць пытанні ўзаемадзеяння ўстаноў адукацыі з Гродзенскім дзяржаўным універсітэтам імя Янкі Купалы і галоўным упраўленнем адукацыі Гродзенскага абласнога выканаўчага камітэта ў рамках арганізацыі дзейнасці абласнога педагагічнага кластара, а таксама асаблівасці паступлення ва ўніверсітэт выпускнікоў профільных класаў педагагічнай накіраванасці.

У мерапрыемстве прынялі ўдзел начальнік галоўнага ўпраўлення адукацыі Руслан Абрамчык, начальнік аддзела агульнай сярэдняй і дашкольнай адукацыі Гродзенскага абласнога выканаўчага камітэта Святлана Кавалеўская, першы прарэктар ГрДУ імя Янкі Купалы Юрый Раманоўскі, рэктар ДУА "Гродзенскі абласны інстытут развіцця адукацыі" Святлана Сяргейка, дырэктар ДУА "Сярэдняя школа № 7 г. Ваўкавыска» Аляксандр Бакуновіч, адказны сакратар прыёмнай камісіі ГрДУ імя Янкі Купалы Ірына Карлюкова, а таксама прадстаўнікі каманд-пераможцаў.

З прывітальным словам да ганаровых гасцей звярнуўся першы прарэктар ГрДУ імя Янкі Купалы Юрый Раманоўскі:

- Прыемна, што ў няпростых эпідэміялагічных умовах мы змаглі правесці Фестываль педагагічных класаў, радуе геаграфія ўдзельнікаў праекта - прадстаўлены ўсе вобласці нашай рэспублікі. Гэта сведчыць аб тым, што мерапрыемства з'яўляецца значным, актуальным і запатрабаваным. Не можа не цешыць і тое, што ўзровень прадстаўленых на конкурс прац з кожным годам расце.

У сваёй прамове першы прарэктар адзначыў, што мэта мерапрыемства - выявіць і раскрыць патэнцыял тых, чыё пакліканне - педагог. Ён падкрэсліў, што педагог - гэта прафесія будучыні і прывёў цытату Прэзідэнта аб тым, што патрыёта і грамадзяніна можа выхаваць толькі патрыёт і грамадзянін.

Начальнік галоўнага ўпраўлення адукацыі Руслан Абрамчык адзначыў, што адным з важных напрамкаў работы галоўнага ўпраўлення адукацыі і ГрДУ імя Янкі Купалы з'яўляецца падрыхтоўка наступнага пакалення педагогаў для работы ва ўстановах адукацыі вобласці і нашай краіны, каб у прафесію прыйшлі матываваныя маладыя людзі, знаёмыя з асаблівасцямі прафесіі, і Фестываль дапамагае выявіць і раскрыць патэнцыял будучых педагогаў.

Як расказаў дэкан педагагічнага факультэта Юрый Гняздоўскі, сёлета мерапрыемства, якое стала ўжо традыцыйным для вобласці, ахапіла ўсю Рэспубліку Беларусь. У IV Фестывалі прынялі ўдзел 114 каманд навучэнцаў педагагічных класаў: 52 каманды навучэнцаў педагагічных класаў з устаноў адукацыі г. Гродна і Гродзенскай вобласці; 34 каманды з устаноў адукацыі г. Мінска і Мінскай вобласці; 14 каманд з устаноў адукацыі г. Гомеля і Гомельскай вобласці; 11 каманд з устаноў адукацыі Брэсцкай вобласці; 3 каманды з устаноў адукацыі г. Віцебска і Віцебскай вобласці.

У перыяд з 25 лістапада па 11 снежня каманды дасылалі конкурсныя працы: відэапрэзентацыі, рэкламныя буклеты «Педагог - гэта… Класна! Стыльна! Адказна! Перспектыўна!», міні-ўрокі. Работы размяшчаліся на старонцы мерапрыемства ў сетцы «Вконтакте», дзе ўжо адбылося інтэрнэт-галасаванне, вынікі якога даступныя ўсім удзельнікам суполкі. Паралельна журы ацэньвала конкурсныя матэрыялы і падводзіла вынікі па ўсіх конкурсах. 24 лістапада было праведзена тэсціраванне на праверку ведаў у галіне педагогікі і псіхалогіі па праграме факультатыўных заняткаў "Уводзіны ў педагагічную прафесію". Тэставанне ажыццяўлялася ў Google форме, да рэгістрацыі дапушчаліся як каманды, так і асобныя ўдзельнікі. У гэтым выпрабаванні прынялі ўдзел 270 рэспандэнтаў, з іх 71 атрымаў максімальны бал - 30.

Фестываль педагагічных класаў накіраваны, у першую чаргу, на павышэнне прэстыжу педагагічнай прафесіі сярод моладзі, на наладжванне цеснага супрацоўніцтва ўніверсітэта і ўстаноў агульнай сярэдняй адукацыі. Мерапрыемства накіравана на выяўленне і развіццё творчых здольнасцей вучняў педагагічных класаў, схільнасці да прафесійнай дзейнасці ў сферы педагогікі, а таксама на падтрымку будучых абітурыентаў.

Пасля семінара ва ўрачыстай абстаноўцы адбылася цырымонія ўзнагароджання пераможцаў конкурсаў IV Фестывалю педагагічных класаў.

Камандам і школьнікам, якія прайшлі тэсціраванне, пасля заканчэння фестывалю будуць адпраўлены электронныя сертыфікаты, у якіх указана колькасць атрыманых балаў.