У канферэнцыі, якая адбылася 18 сакавіка, прынялі ўдзел студэнты, магістранты і аспіранты з Беларусі і Расіі, а таксама польскія навукоўцы.Арганізатарамі «Сацыялагічных чытанняў-2021» выступілі прадстаўнікі кафедры сацыялогіі і спецыяльных сацыялагічных дысцыплін факультэта гісторыі, камунікацыі і турызму Гродзенскага дзяржаўнага ўніверсітэта імя Янкі Купалы.
У пачатку канферэнцыі аб развіцці сацыялогіі ў Польшчы распавяла прафесар Універсітэта ва Уроцлаве Марцаліна Зубер. У сваім пленарным дакладзе яна апісала асноўныя этапы развіцця сацыялогіі ў суседняй рэспубліцы і прадставіла ідэі найбольш вядомых польскіх прадстаўнікоў гэтай сферы навуковай дзейнасці. Выступ Марцаліны Зубер адбыўся ў онлайн-рэжыме. Ва ўдзельнікаў канферэнцыі была магчымасць задаць пытанні дакладчыку і абмеркаваць перспектывы супрацоўніцтва беларускіх і польскіх сацыёлагаў.
Затым удзельнікі «Сацыялагічных чытанняў» працягнулі працу ў фармаце секцыйных пасяджэнняў. Свае навуковыя даследаванні прадставілі студэнты, магістранты і аспіранты Купалаўскага ўніверсітэта, Маскоўскага дзяржаўнага ўніверсітэта імя М. В. Ламаносава, Беларускага дзяржаўнага ўніверсітэта, Беларускага дзяржаўнага эканамічнага ўніверсітэта, Інстытута сацыялогіі НАН Рэспублікі Беларусь. Сярод найбольш цікавых тэм, паднятых падчас канферэнцыі, - «Інтэрнэт як фактар трансфармацыі свядомасці і паводзін сучаснай моладзі», «Сацыяльна-псіхалагічныя тэорыі старэння», «Этычнае спажыванне як прадмет сацыялагічнага даследавання», «Сацыяльныя дэвіяцыі ў сучасным грамадстве».
Па выніках XV Міжнароднай студэнцкай навукова-практычнай канферэнцыі «Сацыялагічныя чытанні» ўсе ўдзельнікі адзначаны дыпломамі, а аўтары лепшых дакладаў удастоены грамат.
