Адкрыццё экспазіцыі прайшло ў рамках святкавання 80-годдзя ГрДУ імя Янкі Купалы.
Урачыстая цырымонія адкрыцця сабрала студэнтаў і супрацоўнікаў універсітэта. У экспазіцыю пад назвай «Паветраны Гродна» ўвайшлі 35 унікальных фотаздымкаў горада і ўніверсітэта, зробленых з вышыні птушынага палёту.
- Творчыя людзі пры дапамозе мастацтва могуць і павінны абуджаць любоў і павагу ў нашай моладзі да сваёй краіны, да яе мінулага, сучаснасці і будучыні, да той спадчыны, якую мы маем, - адзначыў падчас адкрыцця фотавыставы першы прарэктар Гродзенскага дзяржаўнага ўніверсітэта імя Янкі Купалы Алег Раманаў. - Характэрна, што аўтар гэтых работ выказаў сваю любоў да роднага горада, да сваёй малой радзімы і ўніверсітэта, выкарыстоўваючы сучасныя тэхнічныя сродкі, якія зараз ёсць у арсенале фатографаў. Гэтыя фотаздымкі зроблены пры дапамозе квадракоптара, які прабыў у паветры больш за 110 гадзін, налятаўшы пры гэтым 800 кіламетраў.
Пры дапамозе квадракоптара Сяргей Марозаў зрабіў некалькі тысяч фатаграфій. Аўтар паказаў пазнавальныя лакацыі Гродна ў розныя сезоны, у розны час сутак. Для фотавыставы, прысвечанай 80-годдзю ГрДУ імя Янкі Купалы, былі адабраны самыя цікавыя фотаздымкі. Ёсць і тыя, на якіх захаваны корпус роднага Купалаўскага ўніверсітэта.
- Я шчаслівы чалавек, - падзяліўся аўтар, прэзентуючы экспазіцыю. - Шчаслівы таму, што горад, у якім я жыву, натхняе мяне на творчасць, а ўніверсітэт, у якім я працую, дае магчымасці для самавыяўлення. І самае галоўнае, што мая творчасць запатрабавана, бо я магу прадставіць свае работы гледачу, у тым ліку і на гэтай выставе.
Дацэнт кафедры журналістыкі ГрДУ імя Янкі Купалы, кандыдат гістарычных навук Сяргей Марозаў раней неаднаразова прадстаўляў свае фотаработы на персанальных выставах у Беларусі, Расіі, Літве. Ён з'яўляецца намінантам і лаўрэатам рэспубліканскіх і міжнародных фотаконкурсаў, а таксама членам заслужанага аматарскага калектыву Рэспублікі Беларусь народнага фотаклуба "Гродна".
Гродзенскі дзяржаўны ўніверсітэт імя Янкі Купалы