Абмеркаваць актуальныя тэмы і задаць усе пытанні, якія цікавяць, 4 сакавіка змаглі студэнты юрыдычнага факультэта і факультэта біялогіі і экалогіі.
Сустрэча прайшла ў фармаце адкрытага дыялогу, купалаўцы задавалі пытанні, дзяліліся сваімі ідэямі і казалі пра тое, што сёння хвалюе студэнта ГрДУ імя Янкі Купалы.
Ірына Кітурка павітала рабят і заклікала іх быць актыўнымі не толькі на працягу сустрэчы, але і ў сваім студэнцкім жыцці.
Як і на сустрэчы са студэнтамі факультэта мастацтваў і дызайну, матэматыкі і інфарматыкі і філалагічнага факультэтаў, студэнтаў цікавіла тэма засялення ў новы інтэрнат. Ірына Кітурка адзначыла, што рэйтынг, у адпаведнасці з якім будзе праходзіць працэдура размеркавання месцаў, знаходзіцца ў распрацоўцы і запрасіла купалаўцаў прымаць актыўны ўдзел у прапанове ідэй.
Цікавіла студэнтаў і валанцёрская дзейнасць: рабятам спадабалася быць валанцёрамі на II Еўрапейскіх гульнях, і яны гатовыя і далей дапамагаць у арганізацыі такіх маштабных мерапрыемстваў.
Уздымалі пытанне ацяплення ў адным з карпусоў, дзе ў студэнтаў факультэта біялогіі і экалогіі праходзяць лекцыйныя і практычныя заняткі. Гаварылі і пра змяненне ўмоў правядзення творчага конкурсу першакурснікаў «Альма-матэр - каханне з першага курсу», і пра тэхнічнае абсталяванне аўташколы ГрДУ імя Янкі Купалы, і пра зносіны з замежнымі студэнтамі.
Не засталіся па-за ўвагай пытанні раскладу заняткаў і медыцынскага абслугоўвання студэнтаў, а таксама навучання на другой ступені вышэйшай адукацыі па спецыяльнасці «Мытная справа».
У завяршэнне адкрытага дыялогу Ірына Кітурка заклікала студэнтаў быць актыўнымі, рэалізоўваць свае таленты і памятаць, што ўсё залежыць толькі ад іх саміх.
Варта адзначыць, што сустрэчы рэктара са студэнцкім актывам працягваюцца ў Купалаўскім універсітэце. Так, 10 сакавіка рэктар сустрэнецца са студэнтамі факультэта фізічнай культуры і педагагічнага факультэта. Прадстаўнікі факультэта інавацыйных тэхналогій машынабудавання, інжынерна-будаўнічага і фізіка-тэхнічнага факультэтаў запрошаны на сустрэчу 11 сакавіка. 13 сакавіка адкрыты дыялог адбудзецца са студэнтамі факультэта эканомікі і кіравання, факультэта псіхалогіі, а таксама са студэнцкім актывам інтэрната №5.
Гродзенскі дзяржаўны ўніверсітэт імя Янкі Купалы