Навукоўцамі Гродзенскага дзяржаўнага ўніверсітэта імя Янкі Купалы і Гродзенскага дзяржаўнага медыцынскага ўніверсітэта распрацавана арыгінальная псіхадыягнастычная методыка «Шкала саўладання з бясплоддзем». Яна прызначана для вымярэння індывідуальных стратэгій пераадолення цяжкасцей з зачаццем, выношваннем і нараджэннем дзіцяці ва ўмовах медыцынска дыягнаставанага бясплоддзя ў жанчын.
Аўтары методыкі: Канстанцін Карпінскі, доктар псіхалагічных навук, прафесар, загадчык кафедры эксперыментальнай і прыкладной псіхалогіі ГрДУ імя Янкі Купалы; Святлана Бойка, кандыдат медыцынскіх навук, дацэнт, дэкан медыка-псіхалагічнага факультэта ГрДМУ; Юлія Кухарчык, кандыдат медыцынскіх навук, дацэнт кафедры акушэрства і гінекалогіі ГрДМУ; Анастасія Салміна, асістэнт кафедры грамадскага здароўя і аховы здароўя ГрДМУ.
Методыка прызначана для псіхолага-псіхатэрапеўтычнай дапамогі жанчынам, якія маюць бясплоддзе. Таксама распрацоўка накіравана на прафілактыку псіхічных і паводніцкіх расстройстваў у гэтай групы пацыентаў. Методыка ўкаранёна Міністэрствам аховы здароўя Рэспублікі Беларусь у форме інструкцыі па прымяненні ў дзейнасць усіх арганізацый краіны, якія аказваюць медыцынскія паслугі амбулаторным і стацыянарным пацыентам рэпрадукталагічнага профілю, асабліва звяртаюцца да ўрача наконт выкарыстання дапаможных рэпрадуктыўных тэхналогій.
Гродзенскі дзяржаўны ўніверсітэт імя Янкі Купалы