27 лютага ў ГрДУ імя Янкі Купалы пачала сваю працу канферэнцыя «Студэнтацэнтраваны ўніверсітэт: пераемнасць і традыцыі адукацыі, інавацыі і перспектывы развіцця». Мерапрыемства працягнецца два дні.
Галоўнай мэтай канферэнцыі з'яўляецца ўцягванне вучоных, спецыялістаў, экспертаў у галіне адукацыі і навукі ў абмеркаванне пытанняў, звязаных з асаблівасцю функцыянавання сістэм вышэйшай адукацыі, якія патрабуюць укаранення новых тэхналогій, метадаў і падыходаў да навучання і выхавання падрастаючага пакалення.
Усяго ў юбілейнай канферэнцыі прымуць удзел больш за 150 вучоных з вядучых устаноў вышэйшай адукацыі Беларусі, Расіі, Казахстана, Кыргызстана, Узбекістана, Кітая, Сербіі і іншых дзяржаў.
Мадэратарам урачыстага адкрыцця мерапрыемства выступіла прарэктар па навуковай рабоце ГрДУ імя Янкі Купалы Наталля Башун. Яна назвала канферэнцыю значнай пляцоўкай для абмену меркаваннямі, вынікамі працы, выяўлення новых напрамкаў. Таксама прарэктар падзякавала замежным гасцям за актыўнае ўзаемадзеянне і пажадала плённай працы.
З прывітальным словам да ўдзельнікаў канферэнцыі звярнуўся першы прарэктар Аляксандр Карэўскі. Падчас свайго выступу ён зачытаў прывітальны адрас ад рэктара Купалаўскага ўніверсітэта Ірыны Кітурка.
«Развіццё і ўдасканаленне сістэмы адукацыі з'яўляецца адной з ключавых задач для забеспячэння ўстойлівага развіцця краіны. Для таго, каб ісці ў нагу з часам, неабходна апярэджваць магчымыя змены ў навакольным асяроддзі, гэта значыць працаваць на апярэджанне, што закладзена ў «Стратэгіі Гродзенскага дзяржаўнага ўніверсітэта імя Янкі Купалы». Рэальнасць ставіць перад намі новыя выклікі часу, якія патрабуюць эфектыўных спосабаў рашэння. У сувязі з гэтым асноўныя напрамкі канферэнцыі ахопліваюць дастаткова шырокі спектр тэм, ключавых пытанняў і праблем, звязаных з асаблівасцю функцыянавання сістэмы вышэйшай адукацыі. Абмеркаванне такіх значных і актуальных пытанняў немагчыма без шырокага прыцягнення вядучых вучоных, тэарэтыкаў і спецыялістаў-практыкаў», – гаварылася ў звароце.
Віншаванні з 85-годдзем ГрДУ імя Янкі Купалы і прывітання ўдзельнікаў канферэнцыі прагучалі ад гасцей з універсітэтаў-партнёраў: Ташкенцкага дзяржаўнага транспартнага ўніверсітэта, Алтайскага педагагічнага ўніверсітэта, Санкт-Пецярбургскага эканамічнага ўніверсітэта, Нацыянальнага даследчага Томскага політэхнічнага ўніверсітэта, Ціндаоскай вышэйшай педагагічнай спецыяльнай вучэльні.
28 лютага на пленарным пасяджэнні з дакладамі выступяць доктар гістарычных навук, дацэнт Ірына Кітурка, доктар юрыдычных навук, прафесар Ісламбек Рустамбекаў, доктар тэхнічных навук, дацэнт Сяргей Харытончык, доктар фізіка-матэматычных навук, прафесар, акадэмік Куанышбек Шункееў, кандыдат фізіка-матэматычных навук, дацэнт Юрый Раманоўскі, доктар навук у галіне праграміравання Палідан Туэрсун, доктар эканамічных навук Алена Вакуленка.
Акрамя пленарнага пасяджэння, у рамках канферэнцыі 27 лютага арганізавана работа чатырох секцый: «Навукова-педагагічныя школы: эфектыўныя практыкі настаўніцтва і падрыхтоўкі кадраў», «Інавацыйныя тэхналогіі і падыходы да навучання і выхавання моладзі», «Студэнтацэнтраваная адукацыя, студэнцкае супрацоўніцтва».
Падчас канферэнцыі ў холе другога паверха галоўнага корпуса працуе выстава «Навукова-педагагічныя школы: традыцыі і наватарства», арганізаваная навуковай бібліятэкай Купалаўскага ўніверсітэта.
Гродзенскі дзяржаўны ўніверсітэт імя Янкі Купалы