Сучасная сацыялогія, сацыялагічныя даследаванні медыякамунікацый, гістарычныя працэсы скрозь прызму развіцця сацыякультурных практык і сучасныя тэндэнцыі медыяспажывання - гэтыя і многія іншыя актуальныя тэмы абмеркавалі ўдзельнікі XIX Міжнароднай студэнцкай навукова-практычнай канферэнцыі «Сацыялагічныя чытанні – 2025». Навуковае мерапрыемства праходзіць 19 сакавіка ў ГрДУ імя Янкі Купалы.
Канферэнцыя, арганізаваная кафедрай паліталогіі і сацыялогіі ГрДУ імя Янкі Купалы, праходзіць у гібрыдным фармаце і накіравана на стварэнне платформы для абмеркавання актуальных пытанняў сацыялогіі і паліталогіі, абмену навуковымі ідэямі і практычным вопытам паміж студэнтамі, магістрантамі і аспірантамі. Таксама ў навуковым форуме бяруць удзел навучэнцы старэйшых класаў.
Канферэнцыю адкрыў дэкан факультэта гісторыі, камунікацыі і турызму ГрДУ імя Янкі Купалы Віктар Белазаровіч. У сваім прывітальным слове ён адзначыў важнасць тэм, якія абмяркоўваюцца, і значнасць канферэнцыі для маладых вучоных.
– Праблемнае поле нашай канферэнцыі расце, ахопліваючы ўсё больш разнастайныя аспекты сацыялогіі. Мы бачым, як пашыраецца геаграфія ўдзельнікаў: сёння да нас далучыліся студэнты і даследчыкі з розных універсітэтаў, што сведчыць аб высокай цікавасці да тэм, якія мы абмяркуем, – падкрэсліў Віктар Аляксандравіч. – Мы жывем у эпоху імклівых змен, і наша задача – аналізаваць гэтыя змены, шукаць адказы на важныя пытанні і прапаноўваць рашэнні.
З прывітальным словам да ўдзельнікаў таксама звярнуўся загадчык кафедры паліталогіі і сацыялогіі Віктар Ватыль. Ён падкрэсліў актуальнасць тэм канферэнцыі і важнасць міждысцыплінарнага падыходу ў даследаванні сацыяльных працэсаў.
– Сацыялогія як навука пастаянна эвалюцыянуе, і нам важна сачыць за сучаснымі тэндэнцыямі і адаптавацца да іх, – акцэнтаваў увагу Віктар Мікалаевіч.
У рамках працы канферэнцыі ўдзельнікі прадставілі свае даследаванні, праекты і распрацоўкі, а таксама завялі новыя знаёмствы і наладзілі супрацу з калегамі з розных навучальных устаноў.
Па выніках канферэнцыі «Сацыялагічныя чытанні – 2025» будзе падрыхтаваны зборнік навуковых артыкулаў, які пройдзе дэпаніраванне. Электронная версія зборніка будзе размешчана на сайце факультэта гісторыі, камунікацыі і турызму і ў навуковай бібліятэцы ГрДУ імя Янкі Купалы.
Гродзенскі дзяржаўны ўніверсітэт імя Янкі Купалы