У Купалаўскім універсітэце прайшла «Універсітэцкая класная гадзіна» для навучэнцаў дзесятых і адзінаццатых профільных класаў інжынернай накіраванасці. Падобнае мерапрыемства адбылося ў Беларусі ўпершыню.
Як расказаў першы прарэктар ГрДУ імя Янкі Купалы Аляксандр Карэўскі, універсітэт заўсёды імкнецца быць побач з абітурыентамі, дапамагчы ім з выбарам будучай прафесіі. Ідэя правесці "Універсітэцкую класную гадзіну" з'явілася пасля таго, як паспяхова прайшоў вялікі бацькоўскі сход для мам і тат студэнтаў.
– Асабліва актуальная такая класная гадзіна ў сувязі з тым, што сёлета ўпершыню выпускаюцца са школ рабяты, якія вучыліся ў класах інжынернай накіраванасці. І мы хацелі расказаць ім аб траекторыях паступлення, адказаць на пытанні, каб усё было максімальна зразумела і празрыста, - растлумачыў Аляксандр Карэўскі.
Перад школьнікамі, якія навучаюцца ў інжынерных класах, адчыняюцца вялікія магчымасці. Яны могуць выбраць з 70 спецыяльнасцей, якія запатрабаваны на рынку працы. Адказны сакратар прыёмнай камісіі Купалаўскага ўніверсітэта Ірына Карлюкова адзначыла, што ў ГрДУ імя Янкі Купалы ёсць 7 спецыяльнасцей інжынернай накіраванасці.
- Выпускнікам інжынерных класаў даступны падобныя перавагі, як для педагагічных і спартыўна-педагагічных класаў. Калі ў школьніка ў атэстаце ацэнкі па профільных прадметах не ніжэйшыя за 8, а па ўсіх астатніх не ніжэйшыя за 7, ён мае права паступаць у вышэйшую навучальную ўстанову без уступных экзаменаў, а па выніках субяседвання, - расказала Ірына Карлюкова.
Дакументы падаюцца ў першыя тры дні прыёму, з 12 па 14 ліпеня. Пытанні да субяседвання складзены на аснове той праграмы, якую школьнікі вывучаюць у рамках заняткаў. А таксама будучы інжынер павінен напісаць матывацыйнае эсэ і расказаць, чаму ён абраў інжынерную прафесію і чаго ён хоча дасягнуць у гэтай сферы.
Чаму робіцца такі ўпор на інжынерныя спецыяльнасці? Спецыялісты ў гэтай галіне запатрабаваны ў самых розных сферах: ад будаўніцтва да харчовай прамысловасці. Добры інжынер заўсёды патрэбны і цэнны.
У выбары тэхнічнай спецыяльнасці зацікаўлена не толькі дзяржава і эканоміка, але і самі школьнікі, якія гавораць аб перспектыўнасці гэтага напрамку. Навучэнка 10 класа гімназіі № 9 імя Ф.П. Кірычэнка Лізавета Вятошкіна выбрала інжынерную сферу па прыкладзе свайго бацькі і з задавальненнем падзялілася планамі на будучыню:
- Мой тата задзейнічаны ў інжынернай сферы, і менавіта ён натхніў мяне зрабіць такі выбар. Ён часта расказвае пра сваю працу, што робіць, якія задачы вырашае. І я захацела працягнуць дынастыю. Мне хацелася б развівацца ў сферы праграмавання. Мой тата ў гэтым добра разбіраецца і падтрымлівае мяне, падказвае, і я таксама яму ў нечым дапамагаю. Да таго ж гэтая сфера імкліва развіваецца, штучны інтэлект усё больш укараняецца ў наша жыццё.
Не менш захаплення і зацікаўленасці паказаў яшчэ адзін навучэнец 10 класа з гімназіі № 9 імя Ф.П. Кірычэнка Ягор Кісель. Хлопец адзначыў, што прыйшоў на «Універсітэцкую класную гадзіну», каб даведацца як мага больш пра інжынерныя спецыяльнасці ў Купалаўскім універсітэце, а таксама пра працэдуру паступлення, патрабаванні да субяседвання.
– Калі быў на Дні адчыненых дзвярэй ва ўніверсітэце, даведаўся пра працу геадэзіста, і гэтая сфера мяне зацікавіла. Прыйшоў больш даведацца пра яе. Бацькі падтрымалі мяне ў маім выбары, бо важна займацца тым, што падабаецца табе. А без любові да сваёй прафесіі немагчыма развівацца і расці, - расказаў Ягор Кісель.
На класнай гадзіне былі разгледжаны актуальныя пытанні, якія датычацца магчымасцей і асаблівасцей паступлення выпускнікоў інжынерных класаў у вышэйшыя навучальныя ўстановы ў 2025 годзе. Будучыя інжынеры змаглі даведацца аб розных інжынерных спецыяльнасцях, перспектывах кар'ернага росту.
Таксама перад рабятамі выступілі прадстаўнікі спецыяльнасцей інжынернай накіраванасці, такіх як "Фізіка", "Робататэхнічныя сістэмы", "Тэхналогія машынабудавання, металарэжучыя станкі і інструменты", "Эксплуатацыя наземных транспартных і тэхналагічных машын і комплексаў", "Інфармацыйна-вымяральныя прыборы і сістэмы", "Вытворчасць прадукцыі і арганізацыя грамадскага харчавання" і "Будаўніцтва будынкаў і збудаванняў".
Гродзенскі дзяржаўны ўніверсітэт імя Янкі Купалы