Купалаўцы сталі адзінымі прадстаўнікамі Беларусі на Міжнародным студэнцкім конкурсе, фінал якога прайшоў 15 лютага ва Універсітэце прыкладных навук у Каўнасе (Літва).
Супернікамі студэнтаў Гродзенскага ўніверсітэта сталі каманды з Літвы, Італіі і Партугаліі. Дарэчы, купалаўскі ўніверсітэт на конкурсе прадставілі тры каманды студэнтаў спецыяльнасці «Вытворчасць прадукцыі і арганізацыя грамадскага харчавання».
– Падчас конкурсу нашы студэнты дэманстравалі свае веды і ўменні ў галіне кантролю якасці і арганалептычнай адзнакі прадукцыі, мікрабіялагічных даследаванняў і тэхналогіі вытворчасці прадуктаў харчавання, а таксама прадставілі хатняе заданне, якое заключалася ў распрацоўцы інавацыйных прадуктаў харчавання, - распавёў дэкан факультэта біялогіі і экалогіі Аляксандр Карэўскі .
Па выніках спаборніцтва другое месца заняла каманда 3 курса. У яе склад увайшлі Святлана Абузава, Уладзіслаў Гаманчук і Уладзіслаў Ярашэвіч, якіх да конкурсу рыхтавала выкладчык кафедры тэхналогіі, фізіялогіі і гігіены харчавання Наталля Чугай. Трэцяе месца ў каманды 4 курса факультэта біялогіі і экалогіі, у складзе якой Вольга Трыпуць, Вольга Ратнікава і Каханоўская Вікторыя. Кіраўніком дзяўчат з'яўляецца старшы выкладчык кафедры тэхналогіі, фізіялогіі і гігіены Анастасія Кучар.
Пераможцамі «Food Technologist 2018» сталі прадстаўнікі з Італіі.
Гродзенскі дзяржаўны ўніверсітэт імя Янкі Купалы