З 7 па 11 лістапада 2015 года ў Універсітэце імя Гумбальдта ў Бярліне прайшоў міжнародны семінар «Адказнасць юрыдычных асоб за эканамічныя правапарушэнні і злачынствы». Сустрэча адбылася па выніках работы Летняй школы нямецкага права, арганізаванай Універсітэтам у Беластоку сумесна з Універсітэтам імя Гумбальдта ў Бярліне.
У рабоце школы і семінара прынялі ўдзел студэнты 4 курса юрыдычнага факультэта Гродзенскага дзяржаўнага ўніверсітэта імя Янкі Купалы – Вольга Змушко, Анастасія Агеенка і Марыя Крыцкая. Куратарам купалаўцаў выступіла загадчык кафедры канстытуцыйнага права, кандыдат юрыдычных навук, дацэнт Лілія Яраславаўна Абрамчык.
У рамках праграмы семінара ўдзельнікі наведалі Яўрэйскі музей, здзейснілі экскурсію па Рэйхстагу і праслухалі лекцыю пра Бундэстаг, пазнаёміліся з яго гісторыяй, функцыямі, задачамі і механізмам прыняцця рашэнняў.
На юрыдычным факультэце Універсітэта імя Гумбальдта студэнты наведалі лекцыю, на якой даведаліся пра юрыдычную адукацыю ў Германіі, арганізацыю навучальнага працэса, магчымасці працаўладкавання выпускнікоў-юрыстаў універсітэтаў Германіі пасля заканчэння юрыдычных факультэтаў. Удзельнікам семінара расказалі пра магчымасці студэнцкай мабільнасці па праграмах, існуючых у Германіі, а таксама прадставілі цікавую гісторыю станаўлення Універсітэта імя Гумбальдта і юрыдычнага факультэта.
Потым удзельнікі наведалі Міністэрства замежных спраў Германіі, дзе даведаліся пра кампетэнцыі дыпламатычных прадстаўніцтв краіны ў замежных дзяржавах, а таксама абмеркавалі актуальную сёння для Еўрапейскага саюза праблему бежанцаў.
Акрамя таго, студэнты наведалі гістарычны музей Германіі, дзе пазнаёміліся з гісторыяй краіны.
Для ўдзельнікаў быў арганізаваны адукацыйны семінар на тэму «Адказнасць юрыдычных асоб за эканамічныя правапарушэнні і злачынствы». У рамках семінара цікавыя даклады прадставілі прафесар Універсітэта імя Гумбальдта К. Марксен, студэнтка юрыдычнага факультэта Універсітэта імя Гумбальдта Вікторыя Пекарска, студэнты юрыдычнага факультэта Універсітэта ў Беластоку і студэнткі юрыдычнага факультэта нашай ВНУ Крыцкая Марыя, Змушко Вольга і Агеенка Анастасія.
Акцэнт сустрэчы быў зроблены на праблему юрыдычнай адказнасці юрыдычных асоб за эканамічныя правапарушэнні і злачынствы. Удзельнікі семінара абмеркавалі праблемы выкарыстання юрыдычнай адказнасці ў Германіі, Польшчы і Беларусі, а таксама міжнародна-прававыя аспекты крымінальнай адказнасці юрыдычных асоб, узровень эканамічнай злачыннасці.
У канцы сустрэчы было адзначана, што Школа нямецкага права стала ўнікальнай магчымасцю пазнаёміцца з асновамі прававой сістэмы Германіі і Еўрапейскага саюза, удасканаліць веданне нямецкай мовы, у тым ліку ўзровень валодання прафесійнай лексікай. Атрыманы вопыт і веды будуць выкарыстаны студэнтамі спецыяльнасці «міжнароднае права» ў навучальным працэсе і будучай прафесійнай дзейнасці.
З усімі навінамі юрыдычнага факультэта можна пазнаёміцца тут.
Гродзенскі дзяржаўны ўніверсітэт імя Янкі Купалы