На факультэце гісторыі, камунікацыі і турызму ГрДУ імя Янкі Купалы правялі Дзень кітайскай культуры. Арганізатарамі мерапрыемства выступілі дацэнт кафедры перакладу і міжкультурнай камунікацыі Людміла Міхайлаўна Серада, якая ўзначальвае Кабінет Канфуцыя, лабарант кабінета Андрэй Гапонік, старшы выкладчык кафедры перакладу і міжкультурнай камунікацыі Ванг Тао, выкладчык Цзя Нін, выкладчык-стажор гімназіі імя Карскага Лю Сіньюань і педагог-арганізатар студэнцкага гарадка Шэнь Пэн.
На свята прыйшлі не толькі студэнты спецыяльнасці «Лінгвістычнае забеспячэнне міжкультурных камунікацый», якія вывучаюць кітайскую мову як другую замежную, але і студэнты факультэта матэматыкі і інфарматыкі, юрыдычнага факультэта, а таксама слухачы курсаў кітайскай мовы - студэнты іншых факультэтаў універсітэта і гараджане. Усяго ў мерапрыемстве прыняло ўдзел больш за 150 чалавек.
Для гасцей была падрыхтавана разнастайная праграма.
Інструктар па кітайскім аздараўленчым практыкам Кірыл Джух распавёў пра філасофію аздараўленчых практык, якія папулярныя ў сучасным Кітаі. Кірыл паказаў, як можна трэніравацца па правілах аздараўленчай гімнастыкі цігун і прапанаваў гасцям разам з ім выканаць некалькі практыкаванняў.
Педагог-арганізатар студэнцкага гарадка Шэнь Пэн са студэнтамі факультэта даўніверсітэцкай падрыхтоўкі і студэнтамі спецыяльнасці «Лінгвістычнае забеспячэнне міжкультурнай камунікацыі» падрыхтавалі да дэгустацыі сем страў кітайскай кухні, якія лічацца найбольш папулярнымі ў Кітаі: амлет з памідорамі ў кітайскім стылі, падсмажанае мяса крэветак з агуркамі, смажаныя курыныя кубікі з салодкім перцам і арахісам, смажаныя лустачкі свіной выразкі ў кітайскім стылі, шкварка з адварной свініны з шынкамі, рагу з ялавічыны з бульбай і рассыпісты духмяны рыс на гарнір. Госці засталіся вельмі задаволеныя праведзенай дэгустацыяй.
З добрым настроем прайшоў канцэрт. Студэнты 5 курса, якія пабывалі на стажыроўках у Кітаі (Юлія Радымкіна, Надзея Піцуха, Алена Бабко, Кацярына Ігнацьева), выканалі песні на кітайскай мове і прадставілі гумарыстычныя апавяданні. Лабарант кабінета Канфуцыя Андрэй Гапонік прачытаў верш, студэнткі 3 курса спецыяльнасці «Лінгвістычнае забеспячэнне міжкультурнай камунікацыі» Анастасія Талочка, Марына Лялюк выканалі харавыя і сольныя песні пад гітару. Парадавалі сваім выкананнем песень кітайскія студэнты, асабліва ўразілі ўсіх спевы Шэнь Пэна.
У канцы вечара адбыўся паказ мастацкага фільма «Пекінскі веласіпед» кітайскага рэжысёра Ван Сяошуай, у якім знайшлі адлюстраванне праблемы вялікіх гарадоў Кітая: псіхалогія падлеткаў, багацце і беднасць, сумленнасць і падман, якія актуальныя для сучаснага грамадства.
З усімі навінамі факультэта гісторыі, камунікацыі і турызму можна азнаёміцца тут.
Гродзенскі дзяржаўны ўніверсітэт імя Янкі Купалы