З 1 жніўня на свае першыя працоўныя месцы заступілі больш за 55 тысяч маладых спецыялістаў па ўсёй краіне. Амаль трэць з іх - з вышэйшай адукацыяй. Астатняя частка прыпадае на выпускнікоў каледжаў. Кім працуюць маладыя спецыялісты Купалаўскага ўніверсітэта і якія льготы ў іх ёсць?
Маладымі спецыялістамі з'яўляюцца выпускнікі вышэйшых і сярэдніх спецыяльных навучальных устаноў, якія скончылі поўны курс навучання, і накіраваны на працу камісіяй па персанальным размеркаванні. Яны лічацца спецыялістамі на працягу 2 гадоў з дня заключэння працоўнай дамовы з наймальнікам.
Выпускнікі дзяржаўных вышэйшых і сярэдніх спецыяльных навучальных устаноў, якія скончылі іх без адрыву ад вытворчасці, персанальнаму размеркаванню не падлягаюць, у такім парадку яны могуць быць накіраваны на работу толькі па іх жаданні, просьбе.
Дзе пачынаць свой працоўны шлях, Дар'я Прыбылоўская, выпускніца факультэта гісторыі, камунікацыі і турызму Купалаўскага ўніверсітэта, доўга не думала. На працягу 4 курса дзяўчына праходзіла стажыроўку ў Гродзенскай абласной арганізацыі Прафсаюза работнікаў адукацыі і навукі. Тады ж упершыню пазнаёмілася з калектывам. З 1 жніўня малады спецыяліст афіцыйна ў штаце. Дар'я атрымала сваё першае працоўнае месца, а разам з ім і надзейных калег.
- Я з'яўляюся галоўным спецыялістам па інфармацыйнай працы ў Гродзенскай абласной арганізацыі Прафсаюза работнікаў адукацыі і навукі. Гэтая пасада дазваляе мне сумяшчаць працу дызайнера, фатографа, мантажора, журналіста, SMM-спецыяліста і піяршчыка. Штодня выдалена я ўзаемадзейнічаю з калегамі з усіх раёнаў Гродзенскай вобласці для абмену інфармацыяй і стварэння цікавага кантэнту для сацыяльных сетак і сайтаў. Таксама шмат маю зносіны з прадстаўнікамі сродкаў масавай інфармацыі, рыхтую матэрыялы аб нашай арганізацыі для раённых газет і навінавых парталаў. Прафсаюзы праводзяць шмат мерапрыемстваў, удаецца пабываць у розных месцах і пагутарыць з прадстаўнікамі ўлады. Калегі мяне падтрымліваюць, тлумачаць складаныя моманты і заўсёды гатовы прыйсці на дапамогу. Так як я малады спецыяліст, мне пакладзены дадатковыя льготы. На працягу першага працоўнага месяца я атрымаю "пад'ёмныя", якія будуць раўняцца маёй стыпендыі за апошнія паўгода навучання. Таксама з гэтага года з`явіўся дадатковы падатковы вылік для маладых спецыялістаў. А маё сяброўства ў прафсаюзе дае магчымасць атрымліваць ільготы на аздараўленне, - распавяла Дар'я.
Сваімі ўражаннямі падзялілася Надзея Шумавец, выпускніца юрыдычнага факультэта. Дзяўчына размеркавалася ў Гродзенскую рэгіянальную мытню на пасаду інспектара аддзела мытнага кантролю і аперацый мытнага паста "Каменны лог", размешчанага на мяжы з Літоўскай Рэспублікай.
- Інспектар мытнай службы - гэта спецыяліст, які ажыццяўляе кантроль за перамяшчэннем тавараў і транспартных сродкаў праз дзяржаўную мяжу краіны. Праца інспектара мае мноства асаблівасцяў і складаецца з як руцінныя, так і нестандартныя задачы. Сваёй службай і працай мы дэманструем вернасць дзяржаве і беларускаму народу. Адчуваю вялікую падтрымку з боку дзяржавы і кіраўніцтва мытні. Рада, што ўдалося размеркавацца разам з аднагрупнікамі, што дазваляе працаваць нам адным вялікім і дружным калектывам. Праца інспектара мытнай службы - гэта шматгранная дзейнасць, якая патрабуе высокай кваліфікацыі, уважлівасці і здольнасці працаваць у стрэсавых сітуацыях, - падзялілася Надзея.
Больш падрабязна аб статусе "Малады спецыяліст": правы і абавязкі.
Гродзенскі дзяржаўны ўніверсітэт імя Янкі Купалы