Увага да дэталяў, імкненне да інавацый і глыбокія веды ў галіне тэхнікі – усё гэта характарызуе прафесію інжынера, якая адыгрывае ключавую ролю ў развіцці сучаснага свету. 29 кастрычніка навучэнцы інжынерных класаў СШ №8 горада Слоніма пагрузіліся ў свет навукі і тэхналогій, наведаўшы фізіка-тэхнічны факультэт ГрДУ імя Янкі Купалы.
Загадчык кафедры тэарэтычнай фізікі і цеплатэхнікі Аляксандр Бялко правёў гутарку на тэму «У свеце камп'ютарнай фізікі», дзе падрабязна прадставіў асаблівасці спецыяльнасці «Камп'ютарная фізіка». Дзеці даведаліся аб навучальных дысцыплінах, правядзенні практычных і лабараторных заняткаў, арганізацыі практыкі, а таксама навуковай дзейнасці кафедры. Каардынатар па рабоце з інжынернымі класамі Ірына Гаўрылава расказала пра фізіка-тэхнічны факультэт і яго спецыяльнасці.
Падчас мерапрыемства школьнікі змаглі пагутарыць са студэнтамі 3 курса спецыяльнасці «Камп'ютарная фізіка» - Максімам Тодрыкам, Барысам Казіным, Ягорам Матусевічам. Юныя інжынеры даведаліся з першых вуснаў усё пра асаблівасці навучальнага працэсу і студэнцкае жыццё.
Гэтае мерапрыемства не толькі натхніла навучэнцаў на далейшае навучанне і кар'ерны рост у галіне інжынерыі, але і дапамагло ім зразумець важнасць навуковых даследаванняў і інавацый для развіцця сучаснага грамадства.
Гродзенскі дзяржаўны ўніверсітэт імя Янкі Купалы