23 снежня ў Гродзенскім дзяржаўным універсітэце імя Янкі Купалы адбыўся семінар загадчыкаў кафедр, які сабраў прадстаўнікоў розных факультэтаў для абмеркавання актуальных пытанняў навуковай дзейнасці і павышэння рэйтынгу ўніверсітэта.
Першы прарэктар універсітэта Аляксандр Карэўскі адкрыў імпрэзу з прывітальным словам. У сваім звароце ён падкрэсліў важнасць супрацоўніцтва паміж кафедрамі і неабходнасць актыўнага ўдзелу ў навуковай дзейнасці для павышэння іміджу ўніверсітэта на міжнароднай арэне. Прарэктар адзначыў, што семінар – гэта выдатная магчымасць для абмену вопытам і абмеркавання новых ідэй, якія могуць садзейнічаць развіццю навуковай работы.
Спікерамі семінара сталі начальнік інфармацыйна-аналітычнага цэнтра Яўген Алізаровіч і дырэктар навуковай бібліятэкі Мікалай Грынько. Яны прадставілі даклад на тэму «Аб профілях вучоных ГрДУ імя Янкі Купалы ў навукаметрычных базах даных».
Падчас сваёй прэзентацыі Яўген Алізаровіч падрабязна расказаў пра значэнне навукаметрычных паказчыкаў для ацэнкі навуковай дзейнасці ўніверсітэта. Мікалай Грынько дадаў, што бібліятэка гатова аказваць дапамогу вучоным у стварэнні і падтрыманні актуальных профіляў, а таксама ў аналізе навуковай актыўнасці.
Адказны сакратар рэдакцыі часопіса «Веснік ГрДУ імя Янкі Купалы» Наталля Шаршаневіч выступіла з дакладам на тэму «Роля кафедры ў павышэнні рэйтынгу навуковых выданняў універсітэта». Яна акцэнтавала ўвагу на тым, што кафедры адыгрываюць ключавую ролю ў навуковай публікацыйнай актыўнасці і фарміраванні рэпутацыі выдання. Яна заклікала прысутных актыўна ўдзельнічаць у навуковых канферэнцыях і семінарах, што таксама садзейнічае павышэнню рэйтынгу як асобных вучоных, так і універсітэта ў цэлым.
Семінар завяршыўся абмеркаваннем прапаноў і рэкамендацый, а таксама абменам меркаваннямі аб далейшых кроках па паляпшэнні навуковай працы ва ўніверсітэце.
Гродзенскі дзяржаўны ўніверсітэт імя Янкі Купалы