На факультэце біялогіі і экалогіі ГрДУ імя Янкі Купалы адбыўся студэнцкі хакатон, на якім студэнты нашага ўніверсітэта прапанавалі свае ідэі па развіцці экалагічнага турызму ў заказніку «Азёры» і візіт-цэнтра заказніка.
Хакатон праводзіўся ў рамках праекта "Развіццё экалагічнага турызму для садзейнічання зялёнаму пераходу да інклюзіўнага і ўстойлівага росту", які рэалізуецца Праграмай развіцця ААН у супрацоўніцтве з Міністэрствам прыродных рэсурсаў і аховы навакольнага асяроддзя Рэспублікі Беларусь пры фінансавай падтрымцы Расійскай Федэрацыі.
Задачы - распрацоўка тэматычнай канцэпцыі візіт-цэнтра, павышэнне яго прывабнасці і карыснасці для наведвальнікаў у плане тэматычнай напоўненасці і візуалізацыі, выкарыстанне крэатыўных і нестандартных падыходаў для фарміравання агульнай ідэі візіт-цэнтра.
Удзел у хакатоне па фарміраванні, візуалізацыі і прасоўванні крэатыўнай ідэі зместу візіт-цэнтра «Азёры» прынялі студэнты пяці факультэтаў: біялогіі і экалогіі, мастацтваў і дызайну, матэматыкі і інфарматыкі, эканомікі і кіравання, гісторыі, камунікацыі і турызму.
На час хакатона ўдзельнікаў размеркавалі на невялікія каманды для сумеснай працы над стварэннем праекту. За два дні ім трэба было распрацаваць і прадставіць свае ідэі па візуалізацыі асноўнай накіраванасці візіт-цэнтра і прасоўвання экатурызму ў заказніку "Азёры". На аснове найлепшага рашэння будзе распрацаваны рэальны праект для ўвасаблення ў візіт-цэнтры.
Другі дзень хакатона прайшоў на базе Рэспубліканскага ландшафтнага заказніка "Азёры". У склад ментараў і журы ўвайшлі прадстаўнікі заказніка, ПРААН і Гродзенскага дзяржаўнага ўніверсітэта імя Янкі Купалы. Наш універсітэт прадставілі загадчык кафедры заалогіі і фізіялогіі чалавека і жывёл Вольга Янчурэвіч, загадчык кафедры батанікі Алег Созінаў, начальнік цэнтра трансферу тэхналогій Алена Апякун.
Гродзенскі дзяржаўны ўніверсітэт імя Янкі Купалы