Буйны навуковы форум у 19-ы раз прымаў Інстытут сацыялогіі Вроцлаўскага ўніверсітэта (Польшча). Канферэнцыя праводзілася сумесна з факультэтам камунікацыі Універсітэта Індыяны - Універсітэта Пірду, Індыянапаліс (ЗША).
Мерапрыемства аб'яднала прадстаўнікоў Польшчы, Беларусі, ЗША, Украіны, Албаніі, Турцыі, Егіпта, Чада, Перу, Буркіна Фасо, Францыі і Канады. У гэты раз удзельнікамі міжкультурнага форуму сталі студэнткі спецыяльнасці «Лінгвістычнае забеспячэнне міжкультурных камунікацый" факультэта гісторыі, камунікацыі і турызму купалаўскага ўніверсітэта Алеся Прытуленец, Сафія Гаўрыленка, Ксенія Ваганава і Любоў Пятрэнка.
– Вялікая колькасць удзельнікаў зрабіла канферэнцыю сапраўдным форумам міжкультурных зносін, - адзначыла кіраўнік групы, дацэнт кафедры перакладу і міжкультурнай камунікацыі Людміла Серада. - Самай шматлікай была дэлегацыя з ЗША - 22 студэнта, і лагічна, што мовай міжкультурнай камунікацыі была англійская.
Нашы студэнткі паспяхова выступілі з прэзентацыямі па трох тэмах. У сваіх дакладах дзяўчыны паказалі агульныя і адметныя рысы жартаў з розных краін, казалі аб праблемах невербальнай камунікацыі, спецыфіцы культурнага шоку і спосабах адаптацыі да яго на вопыце праходжання стажыровак у Кітаі студэнтамі з Беларусі. Яшчэ адну прэзентацыю аб міжкультурнай спецыфіцы колерасімвалізму прадставіла сама Людміла Міхайлаўна.
– Пасля кожнага выступу прысутныя задавалі пытанні, бо нашы прэзентацыі, праведзеныя ў інтэрактыўнай манеры ў рамках эўрыстычнага падыходу, выклікалі жывую цікавасць да закранутай праблематыкі і былі прызнаныя лепшымі на гэтай канферэнцыі, - падзялілася Людміла Серада. - Дзіўна, што некаторыя амерыканцы ўпершыню пачулі пра Беларусь, яе прыгажосці, шматвяковай гісторыі. Яны праявілі жаданне наведаць нашу краіну па праграме бязвізавага ўезду, а таксама прыехаць да нас ў 2021 годзе на чэмпіянат свету па хакеі.
З усімі навінамі факультэта гісторыі, камунікацыі і турызму можна азнаёміцца тут.
Гродзенскі дзяржаўны ўніверсітэт імя Янкі Купалы