Чацвёрты сезон праекта «Адкрытае навучанне» пачаўся са знакавай сустрэчы з прадстаўнікамі педагагічнай дынастыі Вайтулевічы-Кебічы-Хітрушка-Кавалеўскія Людмілай Кебіч і Вольгай Хітрушка. Сумарны ўзрост педагагічнай дынастыі перавышае 200 год.
У сустрэчы прынялі ўдзел выкладчыкі і студэнты педагагічных спецыяльнасцей Купалаўскага ўніверсітэта, а таксама навучэнцы Гуманітарнага каледжа. Яны змаглі дакрануцца да багатага прафесійнага досведу педагагічнай дынастыі.
Людміла Кебіч – выпускніца Купалаўскага ўніверсітэта 1981 года, музычны педагог з паўвекавым стажам працы, аўтар шматлікіх кніг паэзіі і прозы, паспяхова кіруе Гродзенскім абласным аддзяленнем Саюза пісьменнікаў Беларусі. Яе дачка – Вольга Хітрушка больш за дзесяць гадоў узначальвае гімназію №5 імя В.С. Караткевіча г. Гродна, у якой вучні атрымліваюць не толькі сярэднюю адукацыю, але і развіваюць свае харэаграфічныя, выяўленчыя, музычныя і тэатральныя здольнасці.
Асноўнай тэмай сустрэчы стаў настаўнік як носьбіт высакароднай місіі выхавання пакаленняў, крыніца інтэнсіўнай творчай думкі, уладальнік эфектыўных прыёмаў работы з вучнямі.
Госці адказалі на пытанні мадэратараў і ўдзельнікаў сустрэчы аб шматграннасці іх таленту, прафесійных дасягненнях, гармоніі ў адносінах з вучнямі і калегамі, далі парады маладым педагогам, вызначылі змест творчага задання «Яго праца адна з самых важных», якое выканалі разам з удзельнікамі. Па выніках каманднай працы выкладчыкаў, студэнтаў і навучэнцаў былі вызначаны галоўныя якасці, якімі павінен валодаць чалавек, каб Быць Настаўнікам.
Сустрэча прадэманстравала магчымасці тэхналогіі інтэграванага навучання, якая аб'ядноўвае ў рамках заняткаў разнастайныя формы і метады навучання, абапіраецца на шырокія міжпрадметныя сувязі. Зносіны з гасцямі былі пабудаваны на аснове дыялогу роўных суразмоўцаў, якія ўсведамляюць адказнасць за пастаноўку і вырашэнне ўласных пытанняў. Былі паказаны перавагі бінарнай формы навучання, якая мае на ўвазе дынамічную форму зносін вядучых і навучэнцаў.
Лабараторыя адукацыйных інавацый запрашае прыняць удзел у другім занятку чацвёртага сезона праекта «Адкрытае навучанне», якое адбудзецца 17 кастрычніка 2024 года (вул. Ажэшкі, 22, аўд. 334, пачатак а 15:00). Яго мадэратарам выступіць пераможца ўсерасійскага конкурсу «Медыяапедагог года 2023», кандыдат філалагічных навук, дацэнт кафедры рускай мовы і мовазнаўства Казанскага інавацыйнага ўніверсітэта імя У.Р. Цімірасава Мімоза Фахрутдзінава.
Гродзенскі дзяржаўны ўніверсітэт імя Янкі Купалы