З 13 па 15 снежня ў Санкт-Пецярбургу праходзіў фінал ICPC Northern Eurasia Regional Contests – фінал Студэнцкага каманднага чэмпіянату свету па праграмаванні ICPC у Паўночнай Еўразіі. Каманда Купалаўскага ўніверсітэта заваявала дыплом II ступені ў камандным чэмпіянаце па праграмаванні Паўночнай Еўразіі – 1/4 фіналу каманднага чэмпіянату свету ICPC.
У чэмпіянаце прынялі ўдзел больш за 300 каманд з Беларусі, Расіі, Казахстана, Грузіі, Арменіі, Азербайджана, Кіргізіі, Узбекістана і Таджыкістана. Купалаўскі ўніверсітэт прадставілі дзве каманды.
Чэмпіянат па праграмаванні сярод студэнтаў у Паўночным Еўразійскім рэгіёне - гэта этап найбуйнейшай міжнароднай студэнцкай алімпіяды па праграмаванні ICPC.
Каманда Купалаўскага ўніверсітэта Grodno_SU#1 у складзе магістранта спецыяльнасці «Прыкладная матэматыка і інфарматыка» факультэта эканомікі і кіравання Уладзілена Лакцевіча, студэнта 2 курса спецыяльнасці «Кібербяспека» факультэта матэматыкі і інфарматыкі Аляксандра Малышкі і студэнта 2 курса спецыяльнасці «Праграмная інжынерыя» факультэта матэматыкі Глеба Выскварка заваявала дыплом II ступені і стала чацвёртай сярод каманд устаноў вышэйшай адукацыі Беларусі пасля дзвюх каманд БДУ і адной каманды БДУІР.
У склад каманды Grodno_SU#2 увайшлі студэнт 2 курса спецыяльнасці «Кібербяспека» факультэта матэматыкі і інфарматыкі Ягор Цыбін, студэнты 1 курса спецыяльнасці «Праграмная інжынерыя» факультэта матэматыкі і інфарматыкі Уладзімір Сінкевіч і Аляксандр Пялейка.
Трэнерам каманды з'яўляецца Юрый Сцёпін, старшы выкладчык кафедры матэматычнага і інфармацыйнага забеспячэння эканамічных сістэм.
Даведачна. Студэнтам-праграмістам на працягу пяці гадзін неабходна было вырашыць 12 задач рознага ўзроўню складанасці, а таксама распрацаваць матэматычныя мадэлі і алгарытмы рашэння, даказаць іх правільнасць і аптымальнасць, напісаць праграму на адной з моў праграмавання і праверыць вынік у аўтаматызаванай сістэме тэставання.
Гродзенскі дзяржаўны ўніверсітэт імя Янкі Купалы