Дыялогавая пляцоўка пад назвай "Канстытуцыйныя асновы выбарчай сістэмы: выбарчыя правы моладзі" адбылася 22 лістапада.
Удзельнікамі сустрэчы, арганізаванай з мэтай абмеркавання ключавых аспектаў выбарчых правоў моладзі ў кантэксце актуальнай Канстытуцыі Рэспублікі Беларусь, сталі студэнты і супрацоўнікі Купалаўскага ўніверсітэта.
Адкрыла мерапрыемства рэктар ГрДУ імя Янкі Купалы Ірына Кітурка. У сваёй прамове яна падзякавала сталічнаму госцю за візіт і адзначыла высокую актыўнасць купалаўскай моладзі ў палітычным жыцці краіны:
- Я ганаруся моладдзю, якая вучыцца ў нашым універсітэце, таму што яна прыняла самы непасрэдны ўдзел у дыялогавых пляцоўках па абмеркаванні ўнясення зменаў у Канстытуцыю Рэспублікі Беларусь, а таксама па абмеркаванні праекта Канцэпцыі нацыянальнай бяспекі Рэспублікі Беларусь.
З прывітальнай прамовай да аўдыторыі звярнуўся Старшыня Канстытуцыйнага Суда Рэспублікі Беларусь Пётр Міклашэвіч. Падчас свайго выступу ён расказаў пра сябе, сваю дзейнасць на карысць канстытуцыйнага развіцця Рэспублікі Беларусь.
Акрамя таго, спікер падзяліўся асабістым досведам і поглядам на ролю моладзі ў выбарчым працэсе, а таксама адказаў на пытанні ўдзельнікаў дыялогавай пляцоўкі.
Студэнты і выкладчыкі задавалі самыя розныя пытанні. Яны датычыліся паправак, унесеных у Канстытуцыю Рэспублікі Беларусь, заканадаўчай ініцыятывы Усебеларускага народнага сходу, рэзанансных спраў Канстытуцыйнага Суда Рэспублікі Беларусь, а таксама ўзросту выбаршчыкаў і выбарчай адказнасці моладзі. Разам з тым купалаўцы не ўпусцілі магчымасці пацікавіцца захапленнямі госця ў вольны ад працы час.
Пётр Міклашэвіч падрабязна адказваў на кожнае пытанне, а што да захапленняў, то ён прызнаўся, што вядзе актыўны лад жыцця, захапляецца спортам і матываваў студэнтаў прытрымлівацца яго прыкладу.
У канцы мерапрыемства Пётр Міклашэвіч пакінуў запіс у Кнізе ганаровых гасцей Купалаўскага ўніверсітэта. Скончылася сустрэча агульным фатаграфаваннем на памяць.
Сваімі ўражаннямі ад удзелу ў дыялогавай пляцоўцы падзялілася студэнтка 3 курса юрыдычнага факультэта Аляксандра Федаровіч. Яна адзначыла значнасць дадзенага мерапрыемства напярэдадні выбарчай кампаніі ў Рэспубліцы Беларусь:
- Мы стаім на парозе электаральнай кампаніі, якая адбудзецца 26 студзеня 2025 года. І для нас вельмі важна ведаць свае правы і абавязкі, каб у кантэксце дзеючай Канстытуцыі Рэспублікі Беларусь праявіць грамадзянскую пазіцыю ў будучых выбарах Прэзідэнта нашай краіны, зрабіць правільны выбар на карысць працвітання нашай дзяржавы і грамадства.
Гродзенскі дзяржаўны ўніверсітэт імя Янкі Купалы