2 снежня ў Брэсцкім дзяржаўным універсітэце імя А.С. Пушкіна былі падведзены вынікі Рэспубліканскага маладзёжнага конкурсу мультымедыйных праектаў «Захоўваючы гісторыю».
Гэты конкурс стаў значнай платформай для маладых даследчыкаў, студэнтаў і творчых людзей, якія імкнуцца паглыбіць свае веды аб гісторыі і культуры Беларусі, а таксама зрабіць унёсак у захаванне гістарычнай спадчыны і памяці беларускага народа.
Конкурс прысвечаны вывучэнню гісторыі і культуры Беларусі, захаванню гістарычнай спадчыны і гістарычнай памяці беларускага народа. Члены міждысцыплінарнага студэнцкага навуковага гуртка «PUBLIC HISTORY: гістарычныя веды ў сучасным грамадстве» студэнт 3 курса спецыяльнасці «Гісторыя» Максім Козіч і студэнт 3 курса спецыяльнасці «Журналістыка» Ягор Скепко ўдастоены Дыплома I ступені ў намінацыі «Мультымедыйная прэзентацыя» за адукацыйны інтэрнэт-рэсурс «Гродна: старонкі ваеннай гісторыі».
Гэты адукацыйны інтэрнэт-рэсурс уяўляе сабой глыбока прапрацаваны матэрыял, які асвятляе важныя моманты ваеннай гісторыі горада Гродна, а таксама яго ўплыў на культурнае і сацыяльнае развіццё рэгіёну.
Праца купалаўцаў вылучаецца сваёй шматграннасцю і даступнасцю прадстаўленай інфармацыі. Створаны імі інтэрнет-рэсурс спалучае ў сабе гістарычныя факты, дакументальныя матэрыялы і сучасныя мультымедыйныя элементы, што робіць яго прывабным і карысным як для студэнтаў, так і для шырокай аўдыторыі. Удзел у конкурсе дазволіў маладым аўтарам не толькі прадэманстраваць свае веды, але і абмяняцца досведам з іншымі ўдзельнікамі, а таксама атрымаць каштоўныя рэкамендацыі ад экспертаў у галіне гісторыі і журналістыкі.
Гродзенскі дзяржаўны ўніверсітэт імя Янкі Купалы