11-12 снежня на пляцоўцы бізнес-інкубатара Парка высокіх тэхналогій прайшоў форум інавацыйнага прадпрымальніцтва «Startup Generation». Гэта падзея стала важным этапам у цыкле мерапрыемстваў, накіраваных на развіццё адзінай экасістэмы інавацыйнага прадпрымальніцтва і стартап-руху ў Беларусі, арганізаваных Паркам высокіх тэхналогій на працягу 2024 года.
На працягу двух дзён больш за 200 маладых прадпрымальнікаў з усіх куткоў краіны прадстаўлялі і абаранялі свае праекты перад экспертным журы. На форуме прысутнічалі прадстаўнікі Міністэрства адукацыі, ВНУ, стартап-цэнтра ПВТ і кампаній-рэзідэнтаў, якія падводзілі вынікі года, аналізавалі стан інфраструктуры ў вышэйшых навучальных установах і абмяркоўвалі новыя напрамкі развіцця інавацыйнага прадпрымальніцтва.
У конкурснай праграме былі прадстаўлены 32 праекты, і толькі пяць найбольш перспектыўных, на думку экспертнай камісіі, дайшлі да фіналу. У другі дзень конкурсу маладыя прадпрымальнікі атрымалі ўнікальную магчымасць прэзентаваць свае ідэі перад патэнцыйнымі заказчыкамі і нават выступіць перад першым намеснікам прэм'ер-міністра Рэспублікі Беларусь Мікалаем Снапковым. Ён падкрэсліў, што лепшыя і запатрабаваныя ідэі і стартапы заўсёды будуць падтрыманы ўрадам.
Сярод фіналістаў аказаліся і праекты Купалаўскага ўніверсітэта, якія прадэманстравалі высокі ўзровень інавацый і актуальнасці. Адным з прадстаўленых праектаў стала інавацыйная прадукцыя «Fresh-пазнака», прызначаная для аб'ектыўнай ацэнкі якасці прадукцыі. Гэты праект адпавядае сучасным патрабаванням рынку і можа значна палепшыць працэсы кантролю якасці на прадпрыемствах.
Таксама быў прадстаўлены інтэрактыўны падручнік па спецыяльнай і тактычнай падрыхтоўцы, які накіраваны на паляпшэнне навучальнага працэсу і павышэнне эфектыўнасці падрыхтоўкі спецыялістаў у гэтай галіне. Гэты праект мае патэнцыял стаць важным інструментам у адукацыйным працэсе.
Акрамя таго, студэнты ўніверсітэта распрацавалі кардыякампрэсар, які забяспечвае бесперапынны непрамы масаж сэрца пры транспарціроўцы пацыента і ва ўмовах рэнтгена-эндаваскулярных аперацыйных. Гэта прылада можа адыграць крытычна важную ролю ў экстранай медыцынскай дапамозе.
Не менш цікавым стаў праект персанальнага сервера на Raspberry Pi 5, які дае хостынг і файлавае сховішча для навучальных і асабістых праектаў студэнтаў. Гэтае рашэнне спрыяе развіццю навыкаў праграмавання і працы з сервернымі тэхналогіямі, што асабліва актуальна ва ўмовах імклівага развіцця інфармацыйных тэхналогій.
Нягледзячы на тое, што не ўсе праекты дайшлі да фіналу, удзельнікі конкурсу вельмі высока ацанілі час, праведзены ў бізнес-інкубатары ПВТ. Бо яны атрымалі каштоўны досвед, веды і парады ад экспертаў, прадстаўнікоў бізнесу і дзяржаўнага сектара, завязалі шмат карысных знаёмстваў, а некаторыя нават атрымалі рэальную магчымасць далейшага супрацоўніцтва і ўкаранення сваіх ідэй.
На палях форуму таксама была арганізавана дыялогавая пляцоўка «Перспектывы развіцця інавацыйнага прадпрымальніцтва ў Рэспубліцы Беларусь» і прайшла панэльная дыскусія «Экасістэма развіцця інавацыйнага прадпрымальніцтва: роля ВНУ».
Форум «Startup Generation» не толькі прадэманстраваў высокую актыўнасць маладых прадпрымальнікаў, але і пацвердзіў, што Купалаўскі ўніверсітэт актыўна ўдзельнічае ў фарміраванні інавацыйнага асяроддзя ў краіне. Поспехі студэнтаў і выкладчыкаў універсітэта падкрэсліваюць важнасць інтэграцыі адукацыі і прадпрымальніцтва, што, безумоўна, будзе садзейнічаць эканамічнаму развіццю Беларусі.
Гродзенскі дзяржаўны ўніверсітэт імя Янкі Купалы