Традыцыйна ў перыяд калядных і навагодніх свят у абласным цэнтры праходзіць урачыстае мерапрыемства, на якім ушаноўваюць спартсменаў і трэнераў, якія ўнеслі значны ўклад у развіццё фізічнай культуры і спорту Гродзенскай вобласці ў адыходзячым годзе, паведамляе "Гродзенская праўда".
Удзел ва ўрачыстым прыёме прынялі спартсмены, трэнеры, кіраўнікі аддзелаў, вядучыя спецыялісты і ветэраны спартыўнай сферы вобласці. Сярод іх былі і купалаўцы: старшыня клуба "Гродзенскі Камунальнік" Яўген Ародзь, дацэнт кафедры фізічнага выхавання і спорту ГрДУ імя Янкі Купалы Лісоўскі Станіслаў Тадэвушэвіч, капітан жаночай валейбольнай каманды "Камунальнік-ГрДУ" Ганна Жаафар і нападаючы Анастасія Міклашэвіч, магістрант факультэта фізічнай культуры Аляксей Алфёраў, студэнтка 4 курса факультэта фізічнай культуры Людміла Сінкель.
Павіншаваць іх з перамогамі і падзякаваць за ўпартую працу прыйшлі ганаровыя госці. Гэта старшыня Гродзенскага аблвыканкама Уладзімір Каранік, старшыня абласнога Савета дэпутатаў Алена Пасюта, старшыня Гродзенскага гарвыканкама Андрэй Хмель, старшыня гарадскога Савета дэпутатаў Алег Бялінскі, начальнік упраўлення спорту і турызму аблвыканкама Максім Малахоўскі, старшыня абласнога аб'яднання прафсаюзаў Віктар Лісковіч.
Спартсмены і трэнеры, якія дасягнулі выдатных поспехаў, былі адзначаны Ганаровымі граматамі аблвыканкама, Падзякамі старшыні аблвыканкама, Граматамі Міністэрства спорту і турызму Рэспублікі Беларусь, Граматамі абласнога і гарадскога Саветаў дэпутатаў, Лістамі падзякі старшыні абласнога Савета дэпутатаў, Ганаровымі граматамі гарвыканкама і Падзякамі старшыні гарвыканкама, а таксама Граматамі абласнога аб'яднання прафсаюзаў.
Усяго ўзнагародзілі 34 лепшых трэнераў і спартсменаў рэгіёну па выніках 2024 года.
Гродзенскі дзяржаўны ўніверсітэт імя Янкі Купалы