22 лютага, у Дзень нараджэння Купалаўскага ўніверсітэта, адбылося ўрачыстае адкрыццё новай экспазіцыі выставы «Універсітэт, які стаў маім лёсам. Выпускнікі».
На адкрыцці выставы прысутнічалі ганаровыя госці, сярод якіх былі члены прэзідыума Асацыяцыі выпускнікоў ГрДУ імя Янкі Купалы, а таксама студэнты, супрацоўнікі і прафесарска-выкладчыцкі склад універсітэта. Гэтае мерапрыемства аб'яднала выпускнікоў розных гадоў, ствараючы цёплую і сяброўскую атмасферу.
На ўрачыстым адкрыцці выставы з прывітальным словам выступіла рэктар Купалаўскага ўніверсітэта Ірына Кітурка. Ірына Фёдараўна павіншавала купалаўцаў з Днём нараджэння Alma mater і падкрэсліла важнасць сувязі паміж пакаленнямі выпускнікоў, адзначыўшы, што гэта выстава – сімвал іх адзінства і дасягненняў.
Да ўдзельнікаў мерапрыемства звярнулася Алена Пасюта, старшыня Гродзенскага абласнога Савета дэпутатаў: «Выпускнікі-купалаўцы - гэта гонар не толькі рэгіёну, але і краіны. Дасягненні выпускнікоў натхняюць моладзь і служаць прыкладам для будучых пакаленняў».
Таксама з віншаваннем выступіў Аляксандр Корзун, старшыня Гродзенскага абласнога суда: «Сіла нашага ўніверсітэта ў адзінстве яго выпускнікоў. Гэтая выстава – цудоўная магчымасць узгадаць пра тыя моманты, якія нас аб'ядноўваюць».
Пасля ўрачыстага адкрыцця Ірына Фёдараўна пазнаёміла гасцей з унікальнымі фотаздымкамі, якія адлюстроўваюць дасягненні і ўклад выпускнікоў у развіццё рэгіёну і краіны. Атмасфера мерапрыемства была напоўнена цяплом і адзінствам: удзельнікі дзяліліся ўспамінамі і радаснымі момантамі, звязанымі з вучобай ва ўніверсітэце.
Гэта выстава стала не толькі святам, але і сімвалам моцных сувязей купалаўскай супольнасці, якія захоўваюцца на працягу многіх гадоў. Марафон урачыстых мерапрыемстваў, прымеркаваных да 85-годдзя з дня ўтварэння ГрДУ імя Янкі Купалы, працягваецца.
Гродзенскі дзяржаўны ўніверсітэт імя Янкі Купалы