26 студзеня 2025 года ў Беларусі адбыліся выбары Прэзідэнта. У гэты важны дзень у краіне было арганізавана 5325 выбарчых участкаў. Участкі, размешчаныя ў карпусах і інтэрнатах Гродзенскага дзяржаўнага ўніверсітэта імя Янкі Купалы, сталі не толькі месцам галасавання, але і цэнтрам актыўнага маладзёжнага жыцця, дзе студэнты маглі выказаць сваю грамадзянскую пазіцыю.
На ўчастку № 14 у ГрДУ імя Янкі Купалы, які адкрыўся, першымі прагаласавалі студэнткі факультэта гісторыі, камунікацыі і турызму. Адна з іх, Ганна Марціноўская, падзялілася сваімі эмоцыямі:
– Я зрабіла свой першы выбар, прагаласавала за мірнае неба над галавой, за квітнеючую Беларусь, за магчымасць працаўладкавацца на працу, якая добра аплачваецца, і за тое, каб бясплатная якасная медыцына і адукацыя былі даступныя кожнаму беларусу.
Гэтыя словы адлюстроўваюць надзеі і чаканні маладога пакалення, якое ўступае ў дарослае жыццё з усведамленнем сваёй адказнасці за будучыню краіны. Па добрай традыцыі, упершыню галасуючым уручылі памятныя падарункі, што дадало асаблівую ўрачыстасць моманту.
У гэты дзень асаблівую ўвагу прыцягнула Віта Бакавец, студэнтка 1 курса факультэта гісторыі, камунікацыі і турызму, якая адзначала сваё 18-годдзе на выбарчым участку № 14. Рэктар ГрДУ імя Янкі Купалы Ірына Кітурка павіншавала Віту з такой важнай падзеяй у яе жыцці, падкрэсліўшы, што на маладым выбаршчыку зараз ляжыць вялікая адказнасць за выбар будучыні сваёй Радзімы.
Участак № 11 на базе юрыдычнага факультэта таксама не застаўся без увагі. Ірына Кітурка наведала гэты ўчастак і адзначыла, што атмасфера тут была музычнай, душэўнай і па-сямейнаму цёплай. Не менш радасным момантам стаў і дзень нараджэння яшчэ аднаго маладога выбаршчыка – Арцёма Пятровіча, студэнта 1 курса юрыдычнага факультэта, якога таксама павіншавала рэктар.
Участкі № 135 і № 139 сталі месцам, дзе праявілася крэатыўнасць. Яркія і арыгінальныя нумары, падрыхтаваныя для гледачоў, уразілі разнастайнасцю і творчым падыходам, што зрабіла выбары не толькі важнай палітычнай падзеяй, але і святам для ўсёй універсітэцкай абшчыны.
Выбары Прэзідэнта Рэспублікі Беларусь 26 студзеня 2025 года сталі важным этапам у палітычным жыцці краіны, падзеяй, якая аб'ядноўвае моладзь вакол ідэі актыўнага ўдзелу ў грамадзянскіх працэсах.
Гродзенскі дзяржаўны ўніверсітэт імя Янкі Купалы