Конкурс пройдзе ў Купалаўскім універсітэце з 1 красавіка па 5 мая.
Для ўдзелу ў конкурсе неабходна да 30 красавіка падаць заяўку разам з відэаролікам на электронны адрас kss@grsu.by з паметкай «Мой народ - мой гонар». Конкурс праводзіцца ў два этапы. На першым этапе ўвесь красавік будзе ажыццяўляцца прыём, апрацоўка і адбор конкурсных прац. Затым стартуе другі этап, падчас якога з 1 па 5 мая лепшыя відэаролікі будуць дапушчаныя да онлайн-галасавання.
На адборачным этапе творчыя работы будуць ацэньвацца па такіх крытэрах, як адпаведнасць зместу тэматыцы і ўмовам конкурсу, арыгінальнасць і мастацкі ўзровень працы, наяўнасць гукавога суправаджэння і відэаэфектаў, тэхнічны ўзровень афармлення работы, агульнае эмацыянальнае ўспрыманне і гуманістычны пасыл. Дзвюх- або троххвілінны відэаролік абавязкова павінен мець назву.
Творчыя працы, дапушчаныя конкурснай камісіяй да онлайн-галасавання, будуць размешчаны ў электронным варыянце ў сацыяльнай сетцы «Вконтакте» ў групе «КСС Каардынацыйны савет ГрДУ імя Янкі Купалы». Па выніках галасавання 5 мая пасля 17.00 будуць вызначаныя пераможцы ў намінацыях «Мультфільм», «Музычны кліп», «Відэаблог», «Кароткаметражны фільм» і «Свабодны фармат».
Конкурс відэаролікаў «Мой народ - мой гонар» праводзіцца па ініцыятыве Каардынацыйнага студэнцкага савета ГрДУ імя Янкі Купалы з мэтай выяўлення і падтрымкі таленавітай моладзі, стварэння ўмоў для рэалізацыі творчага патэнцыялу моладзі, захавання нацыянальна-культурных каштоўнасцей беларускага народа. Дадатковую інфармацыю аб конкурсе можна даведацца па нумары тэлефона +375 152 731909.
Гродзенскі дзяржаўны ўніверсітэт імя Янкі Купалы