Супрацоўнікі і студэнты ГрДУ імя Янкі Купалы пабывалі ў гасцях у ветэранаў з падарункамі ў рамках рэспубліканскай прафсаюзнай акцыі «Павіншуем ветэранаў разам».
Валянціна Баранава і Яўген Далідовіч з'яўляюцца таксама ветэранамі працы Гродзенскага дзяржаўнага ўніверсітэта імя Янкі Купалы. Валянціна Баранава выкладала ў гуманітарным каледжы Купалаўскага ўніверсітэта, а Яўген Далідовіч працаваў выкладчыкам кафедры крымінальнага права, працэсу і крыміналістыкі, загадчык лабараторыі тэхніка-крыміналістычных сродкаў, намеснікам дэкана юрыдычнага факультэта ГрДУ імя Янкі Купалы.
Напярэдадні 9 мая да кожнага з іх у госці з прыемнымі падарункамі і пачастункам прыйшлі супрацоўнікі і студэнты Купалаўскага ўніверсітэта - прадстаўнікі прафкама работнікаў і студэнтаў, Каардынацыйнага студэнцкага савета, а таксама Музея гісторыі развіцця ГрДУ імя Янкі Купалы. Госці падзякавалі паважаным ветэранам за здзейснены імі подзвіг, смеласць, стойкасць і мужнасць, павіншавалі з надыходзячым святам і пажадалі яшчэ многіх гадоў актыўнага жыцця, бадзёрасці і аптымізму. У сваю чаргу, Валянціна Баранава запэўніла моладзь, што энергіі ў яе яшчэ шмат і яна шчыра радуецца кожнаму пражытаму дню, заўсёды з задавальненнем прымае запрашэнні на ўсе тэматычныя мерапрыемствы і сустрэчы. Яўген Далідовіч падзяліўся сваімі ўспамінамі пра вайну, а таксама аб гадах работы ва ўніверсітэце.
Прадстаўнікі ГрДУ імя Янкі Купалы ў бліжэйшы час працягнуць віншаваць ветэранаў Вялікай Айчыннай вайны і ўдзельнічаць у мерапрыемствах да Дня Перамогі. 9 мая купалаўцы далучацца да вялікай святочнай праграмы і прапануюць гродзенцам наведаць іх інтэрактыўныя тэматычныя пляцоўкі.
Гродзенскі дзяржаўны ўніверсітэт імя Янкі Купалы