Завяршыўся вучэбна-палявы збор па пачатковай прафесійнай падрыхтоўцы сярод першакурснікаў ваеннага факультэта ГрДУ імя Янкі Купалы.
Падчас заняткаў курсанты ўдасканалілі навыкі ваеннага майстэрства, якія спатрэбяцца ім у будучай прафесійнай дзейнасці. На працягу двух тыдняў першакурснікі жылі ва ўмовах палатачнага гарадка на Гожскім палігоне і асвойвалі ваенную справу. З маладымі байцамі былі праведзены заняткі па агнявой падрыхтоўцы, ваеннай тапаграфіі, ваеннай інжынернай падрыхтоўцы, а таксама тактычнай падрыхтоўцы. Па выніках правядзення комплекснага кантрольнага занятку юнакі атрымалі заслужаныя пагоны курсантаў.
Дарэчы, у гэтым годзе курсантамі ваеннага факультэта Купалаўскага ўніверсітэта сталі 28 чалавек. Пры гэтым 16 першакурснікаў будуць навучацца па спецыяльнасці «Тылавое забеспячэнне войскаў (харчаваннем)», 8 - па спецыяльнасці «Тылавое забеспячэнне войскаў (рэчавай маёмасцю)» і 4 - па спецыяльнасці "Фізічная падрыхтоўка ваеннаслужачых". З ліку новага папаўнення ў інтарэсах Узброеных Сіл ваенным факультэтам ГрДУ імя Янкі Купалы будзе падрыхтавана 20 маладых афіцэраў, у інтарэсах Памежнага камітэта - 2 чалавекі, Унутраных войскаў - 3, Міністэрства ўнутраных спраў - 2 і Міністэрства па надзвычайных сітуацыях - 1 чалавек.
На працягу ўсяго жніўня першакурснікі рыхтаваліся да адказнай падзеі - прыняцця прысягі на вернасць Айчыне. Мерапрыемства пройдзе 4 верасня на Кургане Славы.
Гродзенскі дзяржаўны ўніверсітэт імя Янкі Купалы