У Гродзенскай абласной навуковай бібліятэцы імя Я. Ф. Карскага студэнты і супрацоўнікі Купалаўскага ўніверсітэта мелі магчымасць азнаёміцца з новымі кнігамі беларускага культуролага і кнігазнаўца Алеся Сушы.
Гледачам былі прадстаўлены два выданні: «Беларускі буквар у нацыянальнай і сусветнай прасторы» і «Вынаход буквара ў Беларусі». Апошняе - адаптавана для дзіцячай аўдыторыі.
Алесь Суша расказаў шмат цікавых фактаў: калі і дзе з'явіліся першыя буквары, як яны развіваліся і відазмяняліся, чаму многія буквары не захаваліся, дзе зараз знаходзяцца некаторыя экзэмпляры, якія, на шчасце, дажылі да нашых часоў.
Мадэратарам мерапрыемства выступіў дацэнт кафедры гісторыі Беларусі, археалогіі і спецыяльных гістарычных дысцыплін Аляксандр Горны. У прэзентацыі прынялі ўдзел і студэнты факультэта гісторыі камунікацыі і турызму - удзельнікі студэнцкага даследчага атрада "Ніка". У сустрэчы таксама прынялі ўдзел протаіерэй Аляксандр, настаяцель Каложскай царквы і супрацоўнікі выдавецтва "Беларусь", дзе былі выдадзены прадстаўленыя кнігі.
Азнаёміцца з унікальнымі выданнямі можна ў навуковай бібліятэцы Купалаўскага ўніверсітэта.
Гродзенскі дзяржаўны ўніверсітэт імя Янкі Купалы