Студэнцкая канферэнцыя «Міжнароднае гуманітарнае права. Гісторыя і сучаснасць» аб'яднала ў сценах нашага ўніверсітэта неабыякавых людзей, якія гатовыя прыйсці на дапамогу. Да ўдзелу былі запрошаны студэнты ўстаноў вышэйшай адукацыі і навучэнцы сярэдняй спецыяльнай адукацыі.
Удзельнікі прадставілі даклады ў некалькіх тэматычных секцыях: «Міжнароднае гуманітарнае права. Гісторыя і сучаснасць», «Права Гаагі. Права Жэневы», «Роля Міжнароднага Камітэта Чырвонага Крыжа ў рэалізацыі нормаў Міжнароднага гуманітарнага права», «Валанцёрства як від добраахвотніцкай дзейнасці навучэнскай і студэнцкай моладзі».
Канферэнцыя была заклікана прыцягнуць увагу моладзі да дзейнасці Беларускага Таварыства Чырвонага Крыжа. Таксама арганізатары паставілі перад сабой задачу стварыць умовы для раскрыцця творчых здольнасцей навучэнцаў у сферы міласэрнасці і гуманнасці, што з'яўляецца адным з эфектыўных сродкаў выхавання актыўнай і неабыякавай асобы.
Як падкрэсліла начальнік упраўлення выхаваўчай работы з моладдзю Аксана Котава, у Купалаўскім універсітэце валанцёрская дзейнасць развіта на высокім узроўні. Нашы студэнты прымаюць удзел у акцыях рознага маштабу, заўсёды гатовы прыйсці на дапамогу, нават у самых няпростых умовах.
- Напрыклад,рабяты з нашага валанцёрскага цэнтра на працягу доўгага часу працавалі на беларуска-польскай мяжы летась. Яны працавалі перакладчыкамі і дапамагалі наладжваць камунікацыю паміж бежанцамі і рознымі службамі. Яны дапамагалі нягледзячы на ўмовы надвор'я і стомленасць, - адзначыла Аксана Котава.
Арганізатарамі канферэнцыі выступілі Гродзенская абласная арганізацыя Рэспубліканскага грамадскага аб'яднання "Беларускае Таварыства Чырвонага Крыжа", галоўнае ўпраўленне адукацыі Гродзенскага абласнога выканаўчага камітэта, Гродзенскі дзяржаўны ўніверсітэт імя Янкі Купалы.
Гродзенскі дзяржаўны ўніверсітэт імя Янкі Купалы