Ужо на працягу многіх гадоў купалаўцы штогод рыхтуюць да Дня памяці і смутку тэатралізаваную пастаноўку "Памяць", якая праходзіць ля брацкай магілы савецкіх воінаў і партызан у парку імя Жылібера.
Да прагляду акцыі далучаюцца жыхары Гродна, прадстаўнікі ўлады горада і вобласці, грамадскіх арганізацый і аб'яднанняў, ветэраны, а таксама кіраўніцтва, супрацоўнікі і студэнты ГрДУ імя Янкі Купалы. З году ў год цэнтральная тэма пастаноўкі мяняецца. У гэтым годзе яна была прысвечана генацыду беларускага народа. Асноўнымі арганізатарамі нязменна выступаюць супрацоўнікі і навучэнцы Гуманітарнага каледжа ГрДУ імя Янкі Купалы.
Для тых, хто не змог убачыць пастаноўку ўжывую, выступленні запісваюцца. Стала традыцыяй арганізоўваць у кінатэатры "Космас" урачысты прагляд відэаверсіі штогадовай акцыі "Памяць".
Адкрыла прагляд Ірына Кітурка, рэктар Гродзенскага дзяржаўнага ўніверсітэта імя Янкі Купалы. Яна выступіла са словамі на дарогу падрастаючаму пакаленню. Рэктар адзначыла, што неабходна памятаць і шанаваць памяць загінуўшых абаронцаў Радзімы, усіх ахвяр генацыду беларускага народа.
Ірына Фёдараўна таксама звярнулася са словамі падзякі да ўдзельнікаў і арганізатараў акцыі. Нязменным ганаровым госцем прагляду стала ветэран Вялікай Айчыннай вайны Валянціна Пятроўна Баранава.
Гродзенскі дзяржаўны ўніверсітэт імя Янкі Купалы