У трэцім сезоне лабараторыя адукацыйных інавацый распрацавала для выкладчыкаў Купалаўскага ўніверсітэта шырокую праграму навучальных мерапрыемстваў. У каляндар праекта ўключаны семінары па развіццю міжкультурных кампетэнцый студэнтаў, распрацоўцы тэстаў у кантэксце фарміруючага ацэньвання, арганізацыі і правядзенню творчых хакатонаў і дыстанцыйных алімпіяд, выпрацоўцы новых форм міждысцыплінарнага супрацоўніцтва, пашырэнню магчымасцей прадуктыўнага чытання ў якасці студэнцкага асяродку, дэманстрацыі інструментаў.
Першы навучальны семінар новага сезона паслужыў прыкладам эфектыўнай работы выкладчыкаў юрыдычнага факультэта па развіццю ў студэнтаў навыкаў публічных выступленняў. Як адзначыла дацэнт кафедры крымінальнага права, крымінальнага працэсу і крыміналістыкі Ірына Майсеева, на юрыдычным факультэце з 2015 года рэалізуецца праект па навучанні будучых юрыстаў асновам аратарскага майстэрства, узаемадзеянню з людзьмі розных узростаў і розных прафесій, прадстаўнікамі сродкаў масавай інфармацыі і калегамі-юрыстамі. У снежні 2022 года ў ГрДУ імя Янкі Купалы была створана школа прававой асветы "Ведаць, каб не спатыкнуцца", з 2023 года праект маштабаваны ў школу асветы. Цяпер гэта адзін з пяці сектараў школы - прававы сектар. «Студэнты праводзяць мерапрыемствы па прававой тэматыцы са студэнтамі Купалаўскага ўніверсітэта ў аўдыторыях і інтэрнатах, – падкрэсліла Ірына Майсеева. - Студэнты пераконваюцца на ўласным вопыце ў праўдзівасці слоў, што слова юрыста аказваюць вялікі ўплыў на погляды, перакананні, справы і ўчынкі іншых людзей».
Як выглядае публічнае выступленне, прадэманстравалі студэнткі 2 курса спецыяльнасці «Правазнаўства» Маргарыта Рыжко, Вольга Раманчук, Анастасія Брынявец, Вікторыя Мордань і Вера Сяргей. Яны падрабязна расказалі пра асаблівасці правядзення Адзінага дня галасавання ў Беларусі, які пройдзе 25 лютага 2024 года.
Вялікую цікавасць удзельнікаў семінара выклікала інтэрактыўнае апытанне на платформе Quizizz, якое арганізавалі мадэратары для праверкі ўзроўню засваення інфармацыі аб выбарчай кампаніі 2024 года.
Наступнае мерапрыемства праекту «Адкрытае навучанне» адбудзецца 29 лютага (вул. Ажэшкі, 22, аўд. 334, пачатак а 15:05). Арганізатары запрасілі падзяліцца вопытам развіцця міжкультурных кампетэнцый студэнтаў дэкана факультэта псіхалогіі Вольгу Мітрафанаву.
Рэфлексія ўдзельнікаў семінара.
«Не чакала, што падчас семінара народзіцца ідэя рытарычнай мадэлі фармавання кампетэнцый настаўніка на ўроку (а ўрок, збольшага, таксама фрагмент публічнага выступу)».
Нона Шандроха, дацэнт кафедры беларускай філалогіі, кандыдат педагагічных навук.
"Адчула радасць за нашых таленавітых і ініцыятыўных студэнтаў, за калег, якія гатовы надаваць так шмат часу раскрыццю патэнцыялу студэнтаў, развіццю і ўдасканаленню сваіх уласных кампетэнцый".
Аксана Кавальчук, дацэнт кафедры рамана-германскай філалогіі, кандыдат філалагічных навук
"Падчас семінара было наглядна прадэманстравана, як вучэбная тэма можа быць рэалізавана ў некалькіх кірунках: проста паведамленне - артыкул - навуковая праца - удзел у конкурсе выхаваўчых мерапрыемстваў - школа асветы".
Святлана Ляскевіч, загадчык кафедры замежных моў, кандыдат філалагічных навук
"Я ўбачыла выкладчыкаў з іншага боку, іх адкрытасць і захапленне ў вачах".
Вольга Раманчук, студэнтка 2 курса юрыдычнага факультэта
Гродзенскі дзяржаўны ўніверсітэт імя Янкі Купалы