Гродзенскі дзяржаўны ўніверсітэт імя Янкі Купалы падзяліў з усімі беларусамі радасць святкавання Дня народнага адзінства. Адбыліся як маштабныя мерапрыемствы, так і лакальныя на факультэтах і ў падраздзяленнях універсітэта. У нашым матэрыяле раскажам, як гэта было.
Напярэдадні свята рэктарат і супрацоўнікі, студэнты і выкладчыкі з вялікім задавальненнем далучыліся да напісання Рэспубліканскай дыктоўкі "Дзень народнага адзінства". Удзельнікаў мерапрыемства прывітала рэктар ГрДУ імя Янкі Купалы Ірына Кітурка. Яна адзначыла, што Дзень народнага адзінства асабліва важны для купалаўцаў, бо менавіта дзякуючы аб'яднанню Заходняй і Усходняй Беларусі з'явіўся наш універсітэт.
Важнай даце быў прысвечаны інтэлектуальна-спартыўны турнір «Беларусь: Адзінства. Незалежнасць. Будучыня». На працягу трох дзён каманды не толькі спаборнічалі, але і знаходзілі новых сяброў, запасаліся яркімі ўражаннямі, ды і проста бавілі час. Турнір накіраваны на прыцягненне ўвагі да здаровага ладу жыцця студэнтаў і моладзі, якая працуе.
Купалаўцы з задавальненнем прынялі ўдзел у турніры па зборцы спілс-карт і ў "Забегу адзінства", які прайшоў у наваколлях лесапарку "Пышкі".
А на стадыёне па вуліцы Захарава, 32 сабралася больш за 260 чалавек, каб прыняць удзел у флэшмобе, які сімвалізуе адзінства і згоду. Да ініцыятывы далучылася рэктар Ірына Кітурка.
Таксама ва ўніверсітэце адбыўся шэраг дыялогавых пляцовак. Так, 17 верасня на факультэце гісторыі, камунікацыі і турызму прайшла дыялогавая пляцоўка, прысвечаная Дню народнага адзінства. У інтэрнатах універсітэта ў гэты дзень купалаўцы абмеркавалі актуальнасць і гісторыю свята. Акрамя таго, Ваўкавыскі раённы камітэт Беларускага рэспубліканскага саюза моладзі запрасіў навучэнцаў Ваўкавыскага каледжа ГрДУ імя Янкі Купалы, каб разам з запрошанымі экспертамі абмеркаваць важную дату і яе значнасць для беларускага народа. Навучэнцы каледжа прынялі ўдзел у раённай акцыі па закладцы сквера, які будзе насіць сімвалічнае імя Дня народнага адзінства.
У Гуманітарным каледжы ГрДУ імя Янкі Купалы ў дзень свята прайшоў танцавальны флэшмоб "Мы - адзінае цэлае", у якім прынялі ўдзел навучэнцы, выкладчыкі і прадстаўнікі адміністрацыі.
Падобныя ініцыятывы не толькі ўмацоўваюць сувязі ва ўніверсітэцкай супольнасці, але і нагадваюць аб важнасці сумесных дзеянняў і ўчынкаў.
Дзень народнага адзінства - яркае адлюстраванне таго, наколькі важна і каштоўна адзінства і згода для нашага народа. Купалаўскі ўніверсітэт ганарыцца сваімі студэнтамі і супрацоўнікамі, якія актыўна падтрымліваюць ідэі адзінства і ўзаемападтрымкі, робячы наш свет больш яркім і прыязным.
Гродзенскі дзяржаўны ўніверсітэт імя Янкі Купалы