У Купалаўскім універсітэце праходзіць XIX Міжнародная навукова-практычная канферэнцыя «Актуальныя праблемы экалогіі – 2024», прысвечаная 60-годдзю з дня ўтварэння факультэта біялогіі і экалогіі. Навуковае мерапрыемства праходзіць у гібрыдным фармаце з 1 па 4 кастрычніка.
Сёлета традыцыйная навукова-практычная канферэнцыя «Актуальныя праблемы экалогіі – 2024» пачалася па-асабліваму, бо праходзіць яна ў дні святкавання юбілею факультэта біялогіі і экалогіі.
2 кастрычніка адбылося пленарнае паседжанне. У мерапрыемстве прынялі ўдзел першы прарэктар ГрДУ імя Янкі Купалы Аляксандр Карэўскі і прарэктар па навуковай рабоце ГрДУ імя Янкі Купалы Наталля Башун. Для іх гэта асаблівая імпрэза, бо шмат гадоў менавіта яны стаялі на чале факультэта біялогіі і экалогіі. Пасяджэнне пачалося з даклада дэкана факультэта біялогіі і экалогіі Вольгі Янчурэвіч на тэму «Факультэт біялогіі і экалогіі: учора, сёння, заўтра».
Удзельнікі канферэнцыі – навукоўцы, спецыялісты і студэнты з розных куткоў свету дзеляцца апошнімі навуковымі дасягненнямі, абмяркоўваюць пытанні, якія датычацца сучаснага стану экалогіі планеты, і выпрацоўваюць канкрэтныя рэкамендацыі для яе захавання.
У рамках навуковага форуму праходзяць пленарныя пасяджэнні, секцыі па розных напрамках экалогіі, круглыя сталы і экскурсіі, што стварае спрыяльнае становішча для абмену вопытам і ідэямі паміж удзельнікамі.
Праца канферэнцыі ажыццяўляецца ў рамках 3 секцый – «Маніторынг забруджвання атмасферы, водных і глебавых рэсурсаў, іх рацыянальнае выкарыстанне. Экалагічная адукацыя і асвета ў інтарэсах устойлівага развіцця. Устойлівае выкарыстанне і ахова жывёльнага свету», «Устойлівае выкарыстанне і ахова жывёльнага і расліннага свету», «Экалагічная біяхімія, фізіялогія і медыцына. Харчовыя тэхналогіі ў кантэксце ўстойлівага развіцця».
Адмысловая ўвага нададзена не толькі тэарэтычным аспектам, але і практычным рашэнням экалагічных праблем.
У заключны дзень канферэнцыі ўдзельнікі ва ўрачыстай абстаноўцы пасадзяць дрэва як сімвал адзінства і ўстойлівасці купалавай супольнасці.
Правядзенне падобных мерапрыемстваў садзейнічае ўмацаванню міжнародных навуковых сувязей і развіццю глабальнай навуковай супольнасці ў цэлым.
XIX Міжнародная навукова-практычная канферэнцыя «Актуальныя праблемы экалогіі – 2024» у Гродзенскім дзяржаўным універсітэце імя Янкі Купалы з'яўляецца яркім прыкладам таго, як сучасная навука імкнецца да вырашэння актуальных праблем чалавецтва і захавання навакольнага асяроддзя для будучых пакаленняў.
Гродзенскі дзяржаўны ўніверсітэт імя Янкі Купалы