24 кастрычніка ў Гродзенскім дзяржаўным універсітэце імя Янкі Купалы кітайская мова загучала па-асабліваму. Тут, на беларускай зямлі, у Купалаўскім універсітэце прайшоў прыём грамадзян Кітайскай Народнай Рэспублікі, дэлегацыі Ціндаоскай вышэйшай педагагічнай спецыяльнай вучэльні дашкольнай адукацыі, Навукова-адукацыйнага цэнтра Яацянь.
Важным этапам гэтага знакавага візіту стала сустрэча дэлегацыі з кіраўніцтвам універсітэта, на якой было падпісана Пагадненне аб стварэнні Кітайска-беларускага цэнтра па рэалізацыі праекта "Бан Мо (Рубен. Мазі) каледж" на базе Гуманітарнага каледжа ГрДУ імя Янкі Купалы. Гэты крок уяўляе сабой не проста акт супрацоўніцтва, але і імкненне абодвух бакоў да ўмацавання адукацыйнага ўзаемадзеяння і абмену вопытам у галіне дашкольнай адукацыі. Чакаецца, што цэнтр будзе садзейнічаць развіццю новых праграм, сумесных даследаванняў і культурных ініцыятыў, што, у сваю чаргу, створыць дадатковыя магчымасці для студэнтаў і выкладчыкаў абедзвюх краін.
Наступнай важнай падзеяй у праграме стала ўрачыстае адкрыццё Кітайска-беларускага цэнтра, якое адбылося ў сценах Гуманітарнага каледжа ГрДУ імя Янкі Купалы. Мерапрыемства адбылося ў суправаджэнні музычных нумароў, а кульмінацыйным момантам стала разразанне пунсовай стужкі, якая сімвалізавала пачатак новай гісторыі.
– Я без перабольшання скажу, што сёння гістарычная падзея для сістэмы сярэдне-спецыяльнай адукацыі Рэспублікі Беларусь. Кітайска-беларускі цэнтр, які мы сёння адкрылі – гэта першы такі праект у краіне. Варта адзначыць, што цэнтр адкрыты па ініцыятыве Ціндаоскай вышэйшай педагагічнай спецыяльнай вучэльні дашкольнай адукацыі, з якой мы заключылі дамову аб супрацоўніцтве ў сакавіку гэтага года. Адносіны паміж установамі імкліва паглыбляюцца і пашыраюцца, што сведчыць аб пастаянным росце ўзаемаразумення і даверу паміж партнёрамі. За пару месяцаў мы ўжо паспелі абмяняцца студэнтамі і выкладчыкамі, з'ездзіць у госці адзін да аднаго, – расказала рэктар ГрДУ імя Янкі Купалы Ірына Кітурка.
Таксама госці з КНР змаглі азнаёміцца з магчымасцямі і рэсурсамі каледжа, а таксама абмеркаваць перспектывы далейшага супрацоўніцтва.
Гэты дзень стаў сімвалам узаемаразумення і дружбы паміж Беларуссю і Кітаем, адкрываючы новыя гарызонты, напаўняючы будучую адукацыю яркімі перспектывамі і міжнародным супрацоўніцтвам.
Гродзенскі дзяржаўны ўніверсітэт імя Янкі Купалы