Гродненский государственный университет имени Янки Купалы - VI Гродзенскі турнір юных матэматыкаў праходзіць у ГрДУ імя Янкі Купалы

Вочны этап малодшай лігі, у якім прымаюць удзел вучні 5 - 7 класаў устаноў агульнай сярэдняй адукацыі, стартаваў у Купалаўскім універсітэце 13 мая.

Удзельнікаў турніру павітаў ў сценах універсітэта прарэктар па навуковай рабоце Юрый Раманоўскі. Ён распавёў школьнікам аб магчымасцях, якія прадстаўляюцца ўніверсітэтам, а таксама Навукова-тэхналагічным паркам ГрДУ імя Янкі Купалы, і пажадаў дзецям перамогі, адзначыўшы, што гэты турнір паказвае эфектыўнае ўменне юных матэматыкаў працаваць у камандзе і вырашаць нестандартныя задачы. Ірына Карлюкова, старшыня аргкамітэта і журы, таксама звярнула ўвагу на тое, што турнір юных матэматыкаў - гэта каманднае спаборніцтва навучэнцаў ва ўменні вырашаць матэматычныя задачы даследчага характару, правільна і пераканаўча падаваць атрыманыя вынікі, аргументавана адстойваць свой пункт гледжання ў публічных дыскусіях.

Для ўдзелу ў вочным этапе турніру юных матэматыкаў па выніках папярэдняга адбору былі запрошаны 12 каманд. Сярод іх - каманды гродзенскіх гімназій №2, №3, №10, №7 і № 9, Воранаўскай сярэдняй школы, сярэдняй школы №8 г. Слоніма, гімназіі г. Шчучына, гімназіі №1 г. Дзятлава, Мураванаашмянкоўскага вучэбна-педагагічнага комплексу яслі-сад-сярэдняя школа, Путрышкоўскай сярэдняй школы і зборная каманда Ваўкавыскага раёна. На працягу некалькіх дзён будуць праходзіць паслядоўныя матэматычныя баі, у якіх каманды па чарзе прадставяць свае даследаванні па прапанаваных заданнях, а таксама выступяць у ролі апанента альбо рэцэнзента для іншых каманд-удзельніц. Вочны этап турніру юных матэматыкаў завершыцца 15 мая.

Арганізатарам VI Гродзенскага турніру юных матэматыкаў выступае кафедра сучасных тэхналогій даўніверсітэцкай адукацыі факультэта давузаўскай падрыхтоўкі сумесна з навучальным цэнтрам "Школа дакладных навук" факультэта матэматыкі і інфарматыкі ГрДУ імя Янкі Купалы пры падтрымцы ўпраўлення адукацыі Гродзенскага аблвыканкама. Мэтай турніру з'яўляецца прыцягненне вучняў да даследчай работы ў галіне матэматыкі, прывіццё ім навыкаў правядзення калектыўных навуковых даследаванняў, прадстаўлення і абароны сваіх вынікаў, вядзення навуковай дыскусіі.