Паспяхова вытрымалі дзяржэкзамен 26 курсантаў, якія завяршаюць навучанне па спецыяльнасці «Тылавое забеспячэнне войск».
На экзамене прысутнічалі памочнік Прэзідэнта Рэспублікі Беларусь - інспектар па Гродзенскай вобласці Юрый Караеў і рэктар Гродзенскага дзяржаўнага ўніверсітэта імя Янкі Купалы Ірына Кітурка. Ірына Фёдараўна звярнула ўвагу на тое, што Купалаўскі ўніверсітэт з'яўляецца адзіным у краіне, які выпускае кадравых афіцэраў тылавой спецыяльнасці. Закончыўшы навучанне на ваенным факультэце, яны адпраўляюцца на службу ў вайсковыя часткі краіны і адразу ж займаюць, у адпаведнасці з атрыманай кваліфікацыяй, пасады начальніка харчовай службы і начальніка рэчавай службы.
- Спецыялісты тылу іграюць важную ролю ў забеспячэнні вайсковай часткі. Такіх спецыялістаў не трэба шмат, але ад іх пісьменна арганізаванай працы шмат што залежыць, - падкрэсліў начальнік харчовай службы ўпраўлення тылу Заходняга аператыўнага камандавання Павел Саўчук. - Знаходзячыся ў складзе экзаменацыйнай камісіі, я меў магчымасць ацаніць узровень падрыхтоўкі будучых афіцэраў-тылавікоў. Хачу адзначыць, што дзяржаўны экзамен на ваенным факультэце ГрДУ імя Янкі Купалы прайшоў арганізавана, а курсанты паказалі высокі ўзровень атрыманых імі падчас навучання ведаў, і іх можна смела адпраўляць у войскі.
Падобныя выпрабаванні ў палявых умовах для выпускнікоў спецыяльнасці «Тылавое забеспячэнне» на ваенным факультэце ГрДУ імя Янкі Купалы праводзяцца ўжо трэці год запар.
- Дзяржаўны экзамен для курсантаў гэтай спецыяльнасці прадугледжвае выкананне будучымі афіцэрамі двух практычных заданняў і аднаго тэарэтычнага. Частку выпрабаванняў яны паспяхова вытрымалі некалькімі днямі раней, а зараз выконваюць другое практычнае заданне. Курсанты разгарнулі элементы палявога харчовага пункта, палявую лазню, а таксама рэчавую рамонтную майстэрню, - распавёў начальнік кафедры тылавога забеспячэння ваеннага факультэта ГрДУ імя Янкі Купалы Міхаіл Цвяткоў.
У ходзе практычных экзаменацыйных выпрабаванняў выпускнікі даказалі, што яны лёгка могуць арганізаваць харчаванне усяго асабовага складу ваеннага факультэта, вырабіць рамонт асобных элементаў ваеннай формы адзення, а таксама ліквідаваць раптам узніклую паломку ў швейнай машынцы. Так, без пяці хвілін афіцэр і начальнік харчовай службы, выпускнік ваеннага факультэта Купалаўскага ўніверсітэта Павел Кавалеўскі прызнаўся, што адчувае сябе ўпэўнена і гатовы несці службу і выконваць задачы па атрыманай спецыяльнасці. Для яго не праблема накарміць увесь асабісты склад і прадумаць план харчавання на некаторы час наперад.
- У мяне тата ваенны, таму пытанне з выбарам прафесіі асабіста для мяне было даўно вырашана, - падзяліўся Павел Кавалеўскі. - А ваенны факультэт Гродзенскага дзяржаўнага ўніверсітэта імя Янкі Купалы я абраў менавіта з-за спецыяльнасці «Тылавое забеспячэнне войскаў», бо гэта адзін з найважнейшых этапаў у працэсе забеспячэння жыццядзейнасці войскаў. Калі вайсковец будзе дрэнна харчавацца, то гэта адаб'ецца на яго баявым настроі, і ён не зможа эфектыўна выконваць свае задачы.
Усе 26 экзаменуемых паспяхова вытрымалі дзяржэкзамен і гатовыя да нясення службы. Такой была рэзалюцыя членаў экзаменацыйнай камісіі. Літаральна на днях выпускнікі пазнаюць, куды менавіта яны адправяцца на службу, 26 Чэрвеня атрымаюць дыпломы аб вышэйшай адукацыі і развітаюцца з роднай Alma mater.
Гродзенскі дзяржаўны ўніверсітэт імя Янкі Купалы