Абітурыенты і іх бацькі ўбачылі, чым жыве факультэт і як тут рыхтуюць спецыялістаў, якія штогод папаўняюць шэрагі беларускага войска.
Праграма дня дазволіла максімальна пагрузіцца ў атмасферу навучальных будняў курсантаў. Як распавёў начальнік ваеннага факультэта палкоўнік Лявонцій Паўлаў, на дзень адчыненых дзвярэй прыехалі старшакласнікі з усёй вобласці, і нават былі госці з Баранавічаў.
- Экскурсія праходзіла ў некалькі этапаў, а дзяцей мы падзялілі на групы. Такім чынам, у кожнага з гасцей была магчымасць пра усё дэталёва даведацца і разгледзець. У цэлым, на працягу года ў нас запланавана шмат розных прафарыентацыйных мерапрыемстваў, - распавёў Лявонцій Паўлаў. - Таксама рэгулярна абнаўляем інфармацыю на сайце факультэта і ў нашым Instagram акаунце. Акрамя таго, на факультэт заўсёды можна патэлефанаваць, задаць пытанні, пакінуць свой адрас, куды мы будзем адпраўляць інфармацыйныя лісты. Мы на сувязі і адкрыты да зносін.
Курсанты на ваенным факультэце Гродзенскага дзяржаўнага ўніверсітэта імя Янкі Купалы навучаюцца па дзвюх спецыяльнасцях: «Тылавое забеспячэнне войскаў (па напрамках)» і «Фізічная падрыхтоўка ваеннаслужачых». Кожная са спецыяльнасцяў па-свойму цікавая і карыстаецца вялікім попытам у абітурыентаў.
Экскурсія была максімальна адкрытай і пазнавальнай. Школьнікам паказалі навучальныя аўдыторыі. У адной з іх для гасцей правялі міні-лекцыі, на якіх распавялі, што трэба для таго, каб паступіць на ваенны факультэт. Натуральна, закранулі і тыя перавагі, якія атрымлівае курсант.
Ваенны факультэт ГрДУ імя Янкі Купалы валодае выдатнай матэрыяльна-тэхнічнай базай, якая дазваляе якасна рыхтаваць курсантаў. У школьнікаў была магчымасць паспрабаваць свае сілы на навучальных трэнажорах, патрымаць у руках сапраўдную зброю, задаць пытанні. Важнай часткай экскурсіі стаў паказ узораў ваеннай формы.
Не менш гасцей цікавіў і побыт курсантаў, як яны жывуць па-за заняткамі. Экскурсія закранула казармы і інтэрнат, бытавыя пакоі. Асабліва ажыўленую цікавасць выклікаў пакой вольнага часу, бо там кампанію курсантам складаюць дзве чарапахі і крыска Суета. Догляд за жывёламі і зносіны з імі таксама шмат чаму вучаць. Хлапчукі таксама ацанілі трэнажорную залу, якая выклікае прыхільнасць базавымі трэнажорамі, якія простыя і эфектыўныя ў дасягненні спартыўных мэтаў.
Прыемным завяршэннем экскурсіі стаў абед, на якім частавалі салдацкай кашай і гарачай гарбатай. Было бачна, што дзеці засталіся пад уражаннем і станоўча ацанілі жыццё курсантаў. Аляксей Амбражэвіч і яго бацька Вадзім Амбражэвіч прыехалі на дзень Адкрытых дзвярэй з Баранавічаў.
- Сын вельмі зацікаўлены ў тым, каб стаць афіцэрам, і я цалкам падтрымліваю яго імкненне. На сайце прадстаўлена поўная інфармацыя аб факультэце, але заўсёды хочацца паглядзець ужывую, пазнаёміцца з кіраўніцтвам, пагаварыць з выкладчыкамі, таму вырашылі прыехаць, - падзяліўся Вадзім Амбражэвіч.
Да размовы далучыўся Аляксей:
- Мне падабаецца лад жыцця ваеннага чалавека, ён блізкі майму характару. Паколькі я займаюся спортам, мяне вельмі зацікавіла спецыяльнасць «Фізічная падрыхтоўка ваеннаслужачых». І ўвогуле ўражанні ад дня адчыненых дзвярэй станоўчыя.
Гродзенскі дзяржаўны ўніверсітэт імя Янкі Купалы