Напярэдадні Міжнароднага дня добраахвотнікаў у Мінску адбылася ўрачыстая цырымонія ўшанавання найлепшых валанцёраў у рамках правядзення Рэспубліканскага конкурсу «Валанцёр года 2021».
На ўрачыстай цырымоніі арганізатары конкурсу аб'явілі ўладальнікаў спецыяльнай прэміі "Гуманітарныя валанцёры Беларусі", якая прысуджалася за бескарыслівую дапамогу бежанцам на беларуска-польскай мяжы. Гэтую ганаровую ўзнагароду атрымала студэнтка філалагічнага факультэта ГрДУ імя Янкі Купалы Карына Дорутава, якая працуе на мяжы валанцёрам-перакладчыкам.
Валанцёры заступаюць на змену штодня ўжо працяглы час нягледзячы на стомленасць і ўмовы надвор'я. Студэнты адзначаюць, што працаваць няпроста, але разам з гэтым яны атрымліваюць каласальны досвед і могуць быць карыснымі. Толькі адзінкі з замежнікаў ведаюць рускую мову, частка можа размаўляць на англійскай.
Конкурс "Валанцёр года" праходзіў з 3 кастрычніка па 18 лістапада ў тры этапы: раённы, абласны, рэспубліканскі фінал. У ім прынялі ўдзел валанцёры з розных куткоў Беларусі ў трох узроставых катэгорыях - навучэнская, студэнцкая, працуючая моладзь, а таксама валанцёрскія атрады грамадскіх аб'яднанняў і арганізацый.
Арганізатарамі конкурсу выступілі Беларускі рэспубліканскі саюз моладзі сумесна з Міністэрствам адукацыі, Рэспубліканскім валанцёрскім цэнтрам пры падтрымцы абласных і Мінскага гарадскога выканаўчых камітэтаў, грамадскіх арганізацый і аб'яднанняў.
Гродзенскі дзяржаўны ўніверсітэт імя Янкі Купалы