Гродзенскі дзяржаўны ўніверсітэт імя Янкі Купалы заключыў пагадненне аб супрацоўніцтве з Паўднёва-Заходнім дзяржаўным універсітэтам, які размешчаны ў Курску (Расійская Федэрацыя).
Бакі дамовіліся аб сумеснай рабоце ў адукацыйнай і навуковай дзейнасці, а таксама ў сферы выкарыстання перадавога вопыту і ўкаранення навуковых распрацовак у навучальны працэс. Універсітэты абмеркавалі ўстанаўленне акадэмічных, навуковых і культурных сувязей, развіццё навуковага патэнцыялу і забеспячэння высокай якасці прафесійнай падрыхтоўкі спецыялістаў. Бакі плануюць пабудаваць узаемавыгаднае міжнароднае супрацоўніцтва і перакананы ў перспектывах сумеснай работы.
Акрамя таго, у рамках форуму TIBO, які з'яўляецца ўнікальнай пляцоўкай для абмену перадавым вопытам у сферы тэлекамунікацый, інфармацыйных і банкаўскіх тэхналогій, выставачны стэнд Гродзенскага дзяржаўнага ўніверсітэта імя Янкі Купалы стаў часткай спецыяльнага падзелу TIBO «Адукацыйная алея». Тут госці форуму даведаюцца аб інавацыйнай дзейнасці ВНУ нашай краіны. Таксама ўніверсітэты прадстаўляюць інфармацыю аб адукацыйным працэсе і спецыяльнасцях.
Арганізацыя гэтай экспазіцыі была ініцыіравана Міністэрствам адукацыі Рэспублікі Беларусь. Выставачны стэнд ГрДУ імя Янкі Купалы наведаў Міністр адукацыі Рэспублікі Беларусь Андрэй Іванец і першы намеснік Міністра адукацыі Ірына Старавойтава.
Купалаўцы прэзентавалі лічбавыя сэрвісы і праекты, якія распрацаваны і функцыянуюць ва ўніверсітэце, абмеркавалі далейшае развіццё Купалаўскага ўніверсітэта ў сучасных сацыяльна-эканамічных умовах і глабальнай інфармацыйнай прасторы і, вядома, развіццё сістэмы вышэйшай адукацыі ў цэлым.
Гродзенскі дзяржаўны ўніверсітэт імя Янкі Купалы