У Купалаўскім універсітэце стартавала прыёмная кампанія ў магістратуру. Па добрай традыцыі першых прэтэндэнтаў на паступленне сустрэла рэктар ГрДУ імя Янкі Купалы Ірына Кітурка.
Ірына Фёдараўна прывітала абітурыентаў і пажадала ім удачы на ўступных іспытах. Сярод абітурыентаў людзі самых розных узростаў, якія займаюць розныя пасады. Так, напрыклад, адной з першых патэнцыйных магістрантаў стала старшыня Воранаўскага раённага Савета дэпутатаў Алена Ганевіч. Усе абітурыенты ідуць па новыя веды, якія дапамогуць ім будаваць паспяховую кар'еру. Як распавёў старшыня прыёмнай камісіі Аляксандр Карэўскі, сёлета Купалаўскі ўніверсітэт плануе набраць 345 магістрантаў на больш чым 30 спецыяльнасцяў. З іх 156 чалавек будуць навучацца на бюджэтнай форме.
- У гэтым годзе мы прапануем абітурыентам дзве новыя прафілізацыі - "Сацыяльная псіхалогія" і "Эканоміка і інавацыйнае развіццё бізнесу", - расказаў Аляксандр Карэўскі. - Асабліва цікавая група абітурыентаў, якія прыходзяць да нас з багатым практычным вопытам. Адбываецца каласальны абмен ведамі, ад якога выігрываюць усё. На шчасце, такіх дасведчаных магістрантаў нямала. Гэта сведчыць аб высокай ступені даверу да нас, што не можа не радаваць.
Па заканчэнні магістратуры выпускнікі атрымліваюць больш магчымасцяў для прасоўвання па кар'ернай лесвіцы, для іх адкрыты свет навукі, таксама згодна з абноўленым Кодэксам аб адукацыі выпускнік магістратуры мае права выкладаць ва ўніверсітэце. З году ў год асаблівай папулярнасцю карыстаюцца спецыяльнасці эканмічнага і юрыдычнага профіляў.
З першых вуснаў
Пагутарылі з абітурыентамі і даведаліся, чаму яны вырашылі паступаць у магістратуру і зноў стаць студэнтамі. Таццяна Мармыш заканчвала першую ступень вышэйшай адукацыі на факультэце псіхалогіі ГрДУ імя Янкі Купалы, год прапрацавала і вырашыла паступіць у магістратуру па спецыяльнасці "Сацыяльная псіхалогія".
- Адразу пасля заканчэння ўніверсітэта не было магчымасці вучыцца ў магістратуры, але вось зараз я зноў абітурыент. На гэты момант працую ў Цэнтры сацыяльнага абслугоўвання насельніцтва Слонімскага раёна псіхолагам. Я дапамагаю людзям у цяжкіх жыццёвых сітуацыях, і мне мая праца вельмі падабаецца. Любая прафесія прадугледжвае пастаяннае ўдасканаленне, таму і вырашыла прадоўжыць адукацыю. Хачу падняць узровень ведаў, атрымаць новыя навыкі, каб якасна выконваць свае абавязкі, - падзялілася Таццяна Мармыш.
Старшыня Воранаўскага раённага Савета дэпутатаў Алена Ганевіч мае за сваімі плячамі немалы вопыт кіраўніцкай работы, але яна лічыць, што сучасны кіраўнік заўсёды павінен імкнуцца да новых ведаў.
- Атрыманне новых ведаў заўсёды актуальна, бо свет не стаіць на месцы, ён імкліва развіваецца. Купалаўскі ўніверсітэт – месца, дзе гэтыя веды можна знайсці і потым прымяніць у сваёй працы. Я буду навучацца па спецыяльнасці "Эканоміка і інавацыйнае развіццё бізнесу". Упэўнена, што навучанне дапаможа мне больш якасна выконваць свае службовыя абавязкі і ўнесці ўклад у развіццё Воранаўскага раёна, - адзначыла дэпутат.
Юры Гаўрылаў таксама не адразу прыйшоў да паступлення ў магістратуру. У 2020 ён скончыў факультэт эканомікі і кіравання Купалаўскага ўніверсітэта, папрацаваў, адслужыў у войску і вырашыў працягнуць навучанне ў магістратуры.
- Я зацікаўлены ў тым, каб мае веды пастаянна папаўняліся, і я ўдасканальваўся як прафесіянал. Таму і вырашыў прадоўжыць навучанне. Ды і першая ступень навучання па сутнасці не лічыцца скончанай вышэйшай адукацыяй. Несумненна - гэта каласальная база для будучай кар'еры, але яе трэба папаўняць. Буду навучацца па спецыяльнасці "Эканоміка і інавацыйнае развіццё бізнесу".
Гродзенскі дзяржаўны ўніверсітэт імя Янкі Купалы