Удзельнікамі дыялогавай пляцоўкі сталі прадстаўнікі аўтарскага калектыву навучальнага дапаможніка, а таксама прадстаўнікі выкладчыцкага складу Гродзенскага дзяржаўнага ўніверсітэта імя Янкі Купалы, Гродзенскага дзяржаўнага аграрнага ўніверсітэта, Гродзенскага дзяржаўнага медыцынскага ўніверсітэта, Брэсцкага дзяржаўнага ўніверсітэта імя А.С. Пушкіна, Брэсцкага дзяржаўнага тэхнічнага ўніверсітэта, Баранавіцкага дзяржаўнага ўніверсітэта.
Дадзеная дыялогавая пляцоўка адна з серыі дыскусійных мерапрыемстваў па абмеркаванні навучальных выданняў па дысцыплінах сацыяльна-гуманітарнага профілю ва ўніверсітэтах. Як расказаў рэктар Рэспубліканскага інстытута вышэйшай школы Юрый Бондар, гэты цыкл дысцыплін зведаў сур'ёзныя змены. Дарэчы, раней у Купалаўскім універсітэце прайшло абмеркаванне выдання "Гісторыя беларускай дзяржаўнасці".
- Праца над вучэбным выданнем "Вялікая Айчынная вайна савецкага народа (у кантэксце Другой сусветнай вайны)" была праведзена каласальная. Яно ўключыла ў сябе ўсе дасягненні сучаснай гістарычнай навукі і тыя новыя дадзеныя, якія былі атрыманыя ў ходзе расследавання Генеральнай пракуратуры Рэспублікі Беларусь, прысвечаным генацыду беларускага народа, - расказаў Юрый Бондар. - Галоўная мэта дыялогавых пляцовак - даведацца меркаванне экспертнай супольнасці і выкладчыкаў універсітэтаў, дзе і будуць выкладацца дысцыпліны. Важна пачуць прапановы па метадычным і змястоўным удасканаленні навучальнага дапаможніка.
Як адзначыла рэктар Гродзенскага дзяржаўнага ўніверсітэта імя Янкі Купалы Ірына Кітурка, сапраўды прыйшоў час зірнуць на дадзеную дысцыпліну на новыя вочы ў сувязі з падзеямі апошніх гадоў.
- На мой погляд, вельмі важна не дапусціць дубліравання матэрыялу, каб ён не супадаў са школьнай праграмай. Студэнт ужо можа вывучаць гісторыю Вялікай Айчыннай вайны на іншым узроўні. Больш аналітычна, з пошукам сувязей і заканамернасцяў. Бо вайна - гэта не толькі бітвы на полі бітвы. Думаю, дадзеная дысцыпліна павінна не проста даваць веды, яе задача дастукацца да сэрцаў, - адзначыла Ірына Кітурка.
На тэрыторыі Беларусі разгортваліся адны з найважнейшых бітваў Вялікай Айчыннай вайны, на нашых тэрыторыях быў самы масавы партызанскі рух. І наша зямля больш за іншых пацярпела ад рук карнікаў. Вопыт падрыхтоўкі падобнага навучальнага выдання, якое адлюструе гэтую трагедыю, унікальны, расказаў дацэнт кафедры крыніцазнаўства Беларускага дзяржаўнага ўніверсітэта Кузьма Козак, які з'яўляецца членам аўтарскага калектыву.
- На прасторы СНД больш няма падобнага падручніка, і мы спадзяемся, што нашыя суседзі пяроймуць наш вопыт. Справа ў тым, што студэнт жадае не проста ведаць даты і месцы. Яму цікава задаваць пытанні, разабрацца чаму пачалася вайна, як яна паўплывала на сусветную гісторыю, чым былі матываваны асноўныя дзеючыя асобы. Важны і рэгіянальны аспект. Цяпер выданне праходзіць свайго роду апрацоўку, аўтары заслухоўваюць грамадскую думку, каб унесці карэктывы і ў верасні прадставіць новы навучальны дапаможнік, - распавёў Кузьма Козак.
Дыялогавая пляцоўка па абмеркаванні рукапісу навучальнага выдання "Вялікая Айчынная вайна савецкага народа (у кантэксце Другой сусветнай вайны)" прайшла плённа. Удзельнікі дыскусійнага форуму старанна вывучылі рукапіс выдання і ўнеслі свае заўвагі і прапановы. Абмеркаванне выдалася сапраўды ажыўленым. Кожны з прысутных імкнуўся ўнесці канструктыўныя прапановы, бо матэрыял навучальнага дапаможніка нікога не пакінуў абыякавым.
Тыя факты, што выкладзеныя ў выданні, не могуць не пакінуць адбітак у думках і сэрцы любога, хто азнаёміцца з прадстаўленымі ў ім дадзенымі. Гэта не проста сухія факты і лічбы - гэта лёсы людзей, дзякуючы якім усе мы зараз жывем пад мірным небам.
Гродзенскі дзяржаўны ўніверсітэт імя Янкі Купалы