У межах супрацоўніцтва з Гродзенскай епархіяй Беларускай Праваслаўнай Царквы 24 лістапада ў навуковай бібліятэцы Гродзенскага дзяржаўнага ўніверсітэта імя Янкі Купалы распачаў сваю працу дыскусійны клуб «Праваслаўныя чацвяргі».
Не дзіўна, што напярэдадні зімовых святаў тэма першай сустрэчы – «Рыхтуючыся да Раства Хрыстова». Запрошаным госцем і спікерам стаў пратаірэй Аляксандр Балоннікаў, настаяцель Барыса-Глебскай (Каложскай) царквы, які расказаў прысутным пра гісторыю свята, пра падрыхтоўку да яго не толькі сёння, але і шмат стагоддзяў назад.
Падчас пасяджэння клуба абмяркоўваліся такія пытанні, як асаблівасці і функцыі трымання посту, роля малітвы ў жыцці хрысціяніна і інш. Таксама Аляксандр Балоннікаў падзяліўся сваімі развагамі адносна міласэрнасці, дабрыні, памяркоўнасці і адносна іх успрымання і разумення чалавекам. Прысутныя задавалі цікавыя і глыбокія пытанні, што стала падствай для актыўнай дыскусіі.
Плануецца, што пасяджэнне дыскусійнага клуба «Праваслаўныя чацвяргі» будзе праходзіць 1 раз на месяц. Сачыце за нашымі абвесткамі ў сацыяльных сетках і на сайце бібліятэкі. Шчыра запрашаем!
Гродненский государственный университет имени Янки Купалы