Нядаўна ў магазіны абласных цэнтраў паступіла новая кніга пад назвай «Наш Прэзідэнт». Выданне, прысвечанае біяграфіі Кіраўніка дзяржавы, карыстаецца вялікім попытам. Цікавасць да выдання праявілі як маладыя людзі, так і прадстаўнікі старэйшага пакалення.
Важным аспектам, які варта адзначыць, з'яўляецца тое, што студэнты Гродзенскага дзяржаўнага ўніверсітэта імя Янкі Купалы таксама выказалі імкненне набыць дадзеную кнігу. Для іх гэта не проста магчымасць даведацца больш пра біяграфію і жыццёвы шлях свайго Прэзідэнта, але і спосаб паглыбіць свае веды пра палітыку і гісторыю краіны. Моладзь, якая актыўна цікавіцца сацыяльнымі і палітычнымі працэсамі, імкнецца атрымаць праўдзівую інфармацыю з першых вуснаў, і кніга «Наш Прэзідэнт» дае такую магчымасць.
Многія студэнты дзеляцца сваімі ўражаннямі аб кнізе. Яны адзначаюць, што біяграфія Прэзідэнта напісана даступнай мовай, што робіць яе цікавай і зразумелай для шырокай аўдыторыі.
– Хачу набыць выданне, каб больш падрабязна пазнаёміцца з біяграфіяй нашага Прэзідэнта. Завяду для кнігі сваё месца на паліцы - пастаўлю так, каб адразу кідалася ў вочы. Вельмі прыемны дызайн вокладкі, папера якасная - выданне прыемна трымаць у руках. Таксама гэта можа быць каштоўным падарункам любому паважанаму чалавеку. Упэўнена, кнігай зацікавяцца турысты, а іх у цэнтры Гродна вельмі шмат, – дзеліцца ўражаннямі Паліна Папроцкая, студэнтка 1 курса факультэта гісторыі, камунікацыі і турызму ГрДУ імя Янкі Купалы.
Своеасаблівы жыццёвы нарыс ужо назвалі бэстсэлерам. Кніга, на думку чытачоў, атрымалася дастойная.
– Выданне цікавае як для прадстаўнікоў старэйшага пакалення, так і для моладзі, што пацвярджаецца ажыятажным попытам на яе, – заўважае студэнт 2 курса юрыдычнага факультэта ГрДУ імя Янкі Купалы Аляксандр Сныткін.
Лаўрэнцій Місуна, студэнт 2 курса юрыдычнага факультэта ГрДУ імя Янкі Купалы, намеснік старшыні Маладзёжнага парламента пры Гродзенскім гарадскім Савеце дэпутатаў, з вялікай цікавасцю разглядае кожную старонку выдання:
– Зацікавіўся яшчэ тады, калі толькі анансавалі выпуск гэтага выдання. Сапраўды, прачытаўшы гэту кнігу, можна ўбачыць шлях, які прайшоў наш Кіраўнік дзяржавы. Для сябе адзначыць ключавыя падзеі нашай краіны. На дыялогавых пляцоўках, сустрэчах з працоўнымі калектывамі, з хлопцамі можам прадметна гаварыць аб стадыях развіцця нашай дзяржавы – што было зроблена за гэтыя гады, аб асабістым укладзе Кіраўніка дзяржавы ў гэта.
Раман Дудак, першакурснік факультэта гісторыі, камунікацыі і турызму ГрДУ імя Янкі Купалы, таксама ідзе да касы з выданнем «Наш Прэзідэнт» у руках. З гонарам кажа:
– Тыя, хто ўжо чытаў кнігу, прызнаюцца, што яна выклікае пачуццё датычнасці да падзей, якія згадваюцца на старонках, да лёсу ўсёй нашай любімай краіны. З нецярпеннем чакаю моманту, калі сяду ямчэй і почну чытаць.
Цікавасць да кнігі «Наш Прэзідэнт» паказвае, што моладзь не застаецца ў баку ад найважнейшых падзей у краіне. Яны імкнуцца быць інфармаванымі грамадзянамі, гатовымі актыўна ўдзельнічаць у грамадскім жыцці. Кніга становіцца свайго роду мостам паміж пакаленнямі, дазваляючы старэйшаму пакаленню дзяліцца сваім досведам і поглядамі, а маладым людзям – фармаваць свае перакананні.
Гродзенскі дзяржаўны ўніверсітэт імя Янкі Купалы